Daily Newspaper

TUNGE FEBRY CHU?

16

Zoremi Hmar Zote

Hmeichhia, Sihfa khua la naupang tak, kum 25 vêl hawlh phâk táwk, tuna Bethlehem venga chêng mek, a hming pum Febry K.Zonunmawii nen hian kan inhriatna a la rei lutuk lo va. Ka hriat tanna chu a hla chham mi(poetry) ka chhiar atangin a ni a. A taka ka hmuhna hmasa ber chu, Vanapa hall-a book fest (2019) kan hman khan a ni. Thla te pawh kan la dun a ni âwm a, a hmel ka lo chhinchhiah thiam lo pek a! Tunah chuan ‘Laitumphiss’ khuaah pawh hmu ila, ka àu nalh thei tawh ang.

A hmel niâwma ka lo suangtuah dan aiin, a taka ka hmuh khan a hmelthain a lo naupang fé a. A sam, a dar vaw hnêp chu a thlah siau a, Mizo hnâra mawi lo hnâr mawi a nei; airia lam, zên leh inkkhaithli nalh zaih mai niin, nula ngaihnobei tak a ni. Heti tak maia Mizo tawng sêp kuala chhep chhâwng thiam, thluak tha zet ni si chung hian, naupang pawi sawi lo ang maia mize duhawm, ã phuang mai a’n ni lehnghal vei reuh a, tum fé paw’n ngainat loh luih har tak tur chi mihring a ni. Pathian khawngaihna azârah, Dec ni riat khan a lehkhabu hmasa ber, hla chham mi/ hla hrìl hlang awmna, ‘Chawlhna thingthiang’ tih bu chu MZP Conference hall-ah, Prof. RL.Thanmawia chuan tlangzarhin, kei pawhin rang takin ka lei ve nghal a, ka chhiar nghal chir chir mai maw le!

A hla hrìl (hla châng hril ang ni lovin, a that vanga sawi tham, chhuan tham leh hla chhuanvawr sawina) hrang hrang ka chhiar ve nual tawh a, mak ka ti hle thin. ‘Thu leh hlaah ka tui e’ ka lo ti ve thin te chu ka zak deuh rum rum thei nia! Ni e, hla hril (poetry)-ah na na na chuan ka mitah a champion! Kan thiampuipa Mafaa a fam a, (Lalpa hnenah muangin châwl se) Pathian hian zofate hi min hmangaih tak zet a ni tih rinna nghet tak min neihtirtu atan, he nâu hi min pe leh ta ni hialin ka hria a, a lawmawmin a thlamuanthlak ka ti. Kum sawmruk ràl kan kài hun pawha ziah/phuah nachang kan la hriat loh tur, kan lung a lèn viau pawha a ngaihna reng reng kan hriat loh tur hla mak leh mawi, hetiang rual lekin a bu hiala a chhuah thei hi ka lawm a, hmeichhia ka nihna atang pawhin a bik takin ka chhuang a ni.

Poetry tih tawngkam lo chhuah dan, greek tawng ‘poiema’ an tih atanga lo piang a nih dan te kan sawi vek hman dawn lo va. Sâpho chuan ‘poem’ tiin an hmang. Chutiang hla hrìl chu ‘poetry’ an ti a, a phuahtu pawh ‘poet’ tih a ni ta a ni; poem chuan mimal hla emaw, hla mal emaw a kâwk deuh a, poetry chu hetiang chi hla hrìl pumpui sawina tawngkam atan hman a ni thung.

Mi thiam pui pui, khawvel huapa poet tha kan tih te, critic lâr tak takte pawhin a awmzia sawi fiah fak theia an inchhàl ngam loh, hrilh fiah sên loh hrilh fiah hlawh si, hrilhfiah loh pawha kan thinlunga a nihna chiang em em mai si, ‘poetry’ tih thumal hi, he nau hian a hla hmang hian fiah takin hrilh fiah niin ka hria. Hringnuna thil thleng zawng zawng, a chhe lam emaw, a tha lam emaw pawh ni se, pân hnâi la ang maia tur ut ut-tu, tawngkam tluang pangngai leh hla thu pawha mawi taka a thinlung bun chhuahsaktu hmanrua atan poetry hi a hmang a.

(Theory of Literature phêk 24-na. Prof. RL.Thanmawia ziak)
Sik leh sa, khawvel inher dan mil zela phuah a la thiam cheu! Hun pui hlawm nga, thâl, nipui, fùr, favang leh thlasik lo thleng thin pawh thiam taka hmang tangkaiin, a nun chhungrila awm, amah chênchilhtu, a vei zawngte nena hmehbelin, rem tak leh mawi takin, siamtu thil siam eng pawh mai chu thu leh hlaah a chantir thiam vek mai a ni. Nulat tlangvalna lam hawi, thihnain hringnun a hrual chauh theihzia atanga khumlaizawl nun thlengin, hup leh khuh nei hauh lovin, ‘khuh ru tak siin’ a ziak a ni; a zahmawh lo va, a sexy ru tlat lawi a!

Ka ti rilru hial, a nihna ang tak hian sâp tawngin lehlin ni ta se, William wordsworth-a te meuh pawh khan,

Ngaihtuahna zawng zawng i luah lai khan,
Ngaihngama ngaih ngam i ni lo va;
Ngaihtuah loh dan che ngaihtuah a,
Ngaih loh che hi a ngai em ni!
…a tih te leh,
Fûr chhim khuangruah a lo haw a,
Lunglena rual khûm ka nih lai hian;
Châm reng ang che ka thinlungah.
Vân sâng siar an rawl bo va,
Sihkhaw zo sâng a ngui ruai a,
Ka tah dawn leh i fam si lo!
…a’n tih te hi, chhiarin hmu ve se, hrawk bâwk pial rulh rulha chil lem khulhin, ‘mâwi’ a ti ve hian ka ring a ni; William Wordsworth-a’n poetry a hrilh fiahnaah chuan, “Poetry chu mihring thinlunga vei lo hnâm chhuak hi a ni,” tiin a duh khawp leh lo deuh nge, “Thinlunga kan vei dam diaia han fawm khawm leh hi a chhuaha bul chu a ni,” a ti leh a. Poetry an sawi fiahna hrang hrang, “Poetry chu tha chungchuang bik taka tawng rem khawm, thumal hrang hrangte pawh awmze nei thei, hla thu bil hliah hliaha mi fing tawngkauchheh, thinlung chhungril atanga thu rua ngei rem khawma phuah a ni,” – George Eliot tih te, a tam mai, kan sawi vek sêng dawn lo.

Heng mi ropui tak takte pawhina a fik a faka an hrilh fiah zawh loh khawpa thu ril leh mawi an nih vang tak hian, kan nâuvi hian a nihna a lantir chiang hlein ka hria. =awngkam ngai han hman leh zauh châng a awm ve ang, sawisel tur dap ta ngang tan chuan sawitur chu a awm dawn tho na a, tawngkam/ hla thu bungraw khawn khawm thu-ah chuan mak ka tih khawpin thumal thar a khawrh chhuak hnem a, Mizo tawng a nih hrim chuan a duh duhin chawk let vel a ni ber e; ‘a thiam kutah chuan Mizo tawng hi a lo va han nalh thei ngai ve le’ ka ti ka ti ta mai.

Poetry atana thil pawimawh heng, anmahni chan ni miah si lo, a tuartu emaw, a hlimna ang va tawmpui ve a, amaha inchan a thiamna te phei hi chu a champion-na a ni tak zet! Poetry chu pianhmang fel tak nei chi a nih avangin, thu dang ang lo takin form a nei a, hei hi metrical form tih a ni a, hla tlar dan bî fel taka siam thin a ni bawk a, chu chu meter an ti. Tin, hla thu luang (rhythm) an tih mai a pawimawh a, hla thu luang chu a that chuan rîk dan awmze nei tak (rhythm) siam chhuakin, hla timawitu ber a ni. Hla phuahtu tam tak chuan he hla thu luang hi an ngaih pawimawh luatah hla awmze nei mang lovah an chhuah cháwk a, Zonunmawii hi chu a ni ve lo. Hetiang chi, poetry thuang hrang hrang a thiam bel em em vek mai te hi zir chawp a ni thei lo va, thil pêk a ni.

He lehkhabu ‘Chawlhna thingthiang’ hi, Book cafe-Hrângbana building Chanmari-ah te, Lianchhungi book store-Dawrpuiah leh, Synod bookroom lamah dah chhuah niin, Rs 200 man chauh a ni. Zirlai tan a tha em emin ka ring a. Thu leh hlaa tuimi tan phei chuan khawizu leh bawng hnute-a luan ang maiin, pûr châwk nan duhthusam a ni. Kum 25 mi lekin heti tak maia Mizo tawng a’n thiam mai te hi, thalaite cho chhuahna atan, kan literature tihhausak zualna hmanrua atan hmang ila a va tha dâwn êm!

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy