Tunkar chhung hian Aizawl khawpui fai leh thianghlimna tura Municipal Corporation-in dan a neihte bawhchhia mi 42 manchhuah an ni a. Pawisa chawitir an awm a, ti tawh lo tur emaw siamtha tur emaw hriattirna pek an awm bawk.
Aizawl Municipal Corporation-in Aizawl khawpui fai leh thianghlimna turin Mizoram Municipalities Act 2007 leh AMC Solid Waste Management Bye-Laws 2019 hmangin hma a la thin a. August 19-23 chhunga he dan bawhchhia hriatchhuah zingah, tui luankawra bawlhhlawh paih pawisa chawitir 12, phal lohna hmuna leivung paih vanga pawisa chawi tir 1, septic tank enkawl tha lo leh soakpit tel loa septic tank hmang, siamtha tura hriattir 24 an awm.
Heng bakah hian midang tana rimchhia leh hnawksaka vawk vulh chhungkaw khat chu huntiam chhunga an vawk tiral tura hriattir a nih bakah tuichhe luanna fel lo chhungkaw 4 pawh an tuichhe luanna siamtha nghal tura hriattir an ni.
AMC hian Central Pollution Control Board thuchhuah leh Plastic Waste Management Rules 2016 bawhzuiin AMC Plastic Waste Management Bye-Laws 2019 a siam a. Heng dan hnuaiah hian dan phal loh hman khat daih plastic (banned single use plastic) tirem turin hma a la a. Tunkar chhung khan banned SUP hi kg 72 a man.
Faina leh thianghlimna leh, single use plastic hman khap chungchangah hriselna atan leh leilung venhimna turin kaihhruaina ngaipawimawh turin mitin a ngen tih AMC chuan a sawi a ni.
Tunkar chhungin AMC dan bawhchhia 42 manchhuak
