Federation of Western India Cine Employees (FWICE) chuan Bollywood actor Ranveer Singh thawhpui lo tura an member te hriattirna an tihchhuah tawh chu nimin khan an sût leh ta a, hetihrual hian kumina India film hit zet mai ‘Dhurandhar’ changtupa hian FWICE hi legal notice a pe ve thung.
Ranveer Singh leh FWICE te buai tanna hi Bollywood film ‘Don 3’ siam tur atanga Ranveer Singh a inhnuh dawh leh thut vanga he film siamtu Farhan Akhtar nena an inkar thuchhia kal zel rah chhuah a ni a, Bollywood history-a chanchin bengkhawn hlawh zual a tling ta hial a ni.
‘Don 3’ film-ah hian Ranveer Singh hi chang tura tihfel vek tawh a ni a, mahse, film siamtu Farhan Akhtar nen an kar thu a chhiat tak avangin Ranveer hi a inhnukdawk leh ta thut a, Akhtar a company Excel Entertainment chuan hetianga Ranveer Singh a inhnuh leh thut avang hian compensation cheng vaibelchhe 45 a phut ta a, FWICE hian he actor lakah hian non-cooperation directive an tichhuakin, an member te chu Ranveer Singh hi thawhpui lo tura an tihna an tihchhuak ve nghal bawk a ni.
Ranveer Singh hian ‘Don 3’ atanga a inhnuhdawh leh takna chhan film siamtute nena creatuvity lama inlungrual lohna bakah production an tihkhawtlai zel vang te, final script a awm theih loh vang te niin report a awm a, mahse, Ranveer erawh hemi chungchang hian a ngawi rih a, FWICE hi legal notice a pe a, a legal notice-ah hian engtiang chiahin nge thu an kalpui tih pawh puanzar a ni lo.
FWICE president BN Tiwari chuan Ranveer Singh nena an pawl inkarah hian a chak zawk leh chak lo zawk pawh an awm chuang lo niin a sawi a, PTI chuan Indian Motion Picture Producers’ Association, Producers Guild of India leh Cine & TV Artistes’ Association te an inrawlh hnuah FWICE hian an thuchhuah hi an hnuk kir leh ta niin an tarlang.
Tunlai Bollywood buainaah FWICE-in Ranveer Singh thawhpui loh tur tia an thuchhuah an sût
