R.Lalfakawma Seling
An film channa en chuan nuam zawng zawng an nei ta vek bik emaw tih tur khawpa khawsain an sa râk chiam chiam a; mahse, rala khata kan lo hmuh ang ngawt chu a lo ni hauh lo mai. Porn star lar berte zinga mi ni thin an kawmna ka en fuh a, rilru lama harsatna a neih nasatzia a sawi nasa hle. Puitling film lam a bansanna kum 6 liam ta kha ni tawh mah se a nun hlui thiltihte kha mang chhiaah changin a um zui a, nun nuam a ti lo va, mahni intihhlum duhna rilru a pu fo mai a ni awm e.
Mizo nula tlangvâlte pawh kan khaw hawi a zau tial tial a, chu chu thiltihin a zui ve zêl a. Hnam dangte thawhrimna leh chhelna te, an nun entawntlak laite hmuin thenkhat chu nupui pasal ngaihtuah hman lo leh chhungte pawh thlahlel thei lo khawpin an thawk rim a. An rilru a puitlin miau avângin naupangtê ni chungin chhungkaw ei bêl an ni nghal thuai mai a, anni hi chhungkua, khawtlang leh ram tan mi tangkai an ni chho zêl dawn a ni.
Kawng lehlamah chuan hmasawnna leh khaw hawi zauh avângin nghawng tha lo tam tak kan tuar ve mêk tho a. Mi thenkhatte mi thil tha tih an hmuh avânga tum ruhna nen an inhum phek laiin thenkhat erawhin, “Ka thil hmuh leh benga ka hriatte hian sualah min hruai lut” tih hla kan sak thin kha a takin an lo nunpui ve mêk bawk a. Pangpâr mawi êm êm pawh mawi ti leh ti lo kan awm ang mai hian kan thil hmuhin keimahnia nghawng a neih dan hi a danglam nasa thei khawp a. “Zingah savâ ten Pathian an chawimawi” tihte pawh hi thenkhat chuan an hur hrâm vêl, kawppui tur zawng hrâm mai maiah an lo ngaihsak vê bawk a; ngaih dan a tam, pawm dan a tam a ni ber e.
Hma kan sawn nasat ang zelin kan thil thlir dan pawh a inher danglam chho zêl dawn a. Aizawl veng pakhat YMA ten khawhar in riah loh an tiha mak kan tihzia leh Mizo lo ngawih ngawiha kan hriatna kha nimin lawk a ni a; mahse, tunah chuan veng/khaw tam takin khawhar in riah loh kan kalpui ta der mai. Nula pakhat, kekawrte pum leh bra chhah chi nen ngata a thlalak vânga kan khenbehna pawh nikum lawk a ni a; vawiinah chuan zahmawh rawng kai mai ni lo, a rim nam vut vut khawp kan hmu leh ta e.
‘Philadelphia street’ tiin YouTube han hawng ila, Kensington Avenue vêlah chuan mi pangngai ten an pawlh dal miah lohvin ruihhlo ngaite khawsak phung tam tak hmuh tur a awm a. Zombie drug an tih chu ruiin zombie-te awm dan ang maiin zalen takin an che maksak a, “Heti êm êm hian a ni maw le!” tih vawng vawng turin posi lai laklawh lutuka ding âwn vung vung hmuh tur an tam mai. Mi thenkhat chuan Philadelphia mayor-in hma a lak loh vâng a ni tiin an dem viau mai. |henkhat chuan an Governor-in he kawtthler hi a then fai loh vângin amah chu tuar tur zawk a ni te an ti a; thenkhat lahin helai hmuna khawsate anga an awm ve loh avângin Pathian hnenah lawmthu an lo sawi ve mêk bawk. Mizo kristian fel takte zinga ngaih dan tlanglawn tak, jail-ah emaw, rehabilitation centre-ah emaw “dah bo rawh u” ti tawk pawh an awm ve tho.
Hetiang hmun han en chuan Aizawl khawpui khawi lai lai emaw mitthlaah an lo lang nghal a. Keini ramah chuan vêng tangrual pawl, YMA, welfare ten vêng hmai tibaltuah kan ngai a, hnawh bo hna kan thawk thuai zêl a; sâpho hian min tluk lo khawp mai. London, Manchester, Barcelona, Pattaya….khawpui hrang hranga an zan lam hun hman dante hi a khawvêl si a, Mizoram-ah hian rawn awm ta thut se, tlaivârin kan va duty nasa dawn êm!
Nula hmêl tha lo ve tak, thau chum beng buangte pawhin kekawrtê lang dawn dawna chhîng an inbel a. Pian mawi leh mawi loh an enghelh lo, an duh ang angin an inchei a ni ber. Mizo ten “Hmeichhe nalh duhin khaw vawt an hre lo” kan tih zawng zawng kha nei zovin taksa lang kêng kûnga incheiin vawt tiin an inkuah khawr ang tît têt thung a. An kianga police duty-te lah chuan nula rui deuh anga langte pawh ‘man tang ei’ an ti ngawt lo va, puih an ngaihnaah an la pui zawk hial nia!
Kan nula tlangvâlte inchei duh dan pawh a hun leh a hmun azirin an ngam huai ve ta hle mai a. Tui chênnaah tui chên kawr nena hleuh ve mai ngam te; mipa rual kara taksa lang tam thei thawmhnaw hak hreh lo pawh an pung ve ta zêl mai. Tin, hmeichhe tam tak phei chu ‘a thla lang thei’ khawpa kekawr ha tawt leh pawt chhing ngam an awm ta fur mai a nih hi. Hman deuh khan officer nu pakhatin khawtlang khaipa deuhte zirtirna min pe a. Nu ngo lam, hmêl tha tak a nih vei nen a kekawr hakah khan a thla a lang tlat mai a, kan indin hnaih nen, a thusawi hriat loh hlauvin melh pawh kan melh tha ngam nâng. En manah Rs 500 chawi ve lo mah ila, vawiin thlenga kan sawi chu a la nih ve tho hi maw.
Tunlai khawvêlah kan thil thlir dan te, kan hnathawh te, kan nun phung leh incheina, khawsak dan zawng zawngte tho pa zuana a zuan lai hian a mawi lo lam, a tha lo lam ken tel pawh a ngah tih kan sawi ta a. |henkhat chuan kawng hrang hranga hmasawn kan duh viau rualin a ken tel thil erawh kan hmu thiam duh tlat lo va. A tha lo lam zawng zawng thin thlak a, fiah fel fâi thulha a tha hlang awm kan tum emaw tih turin tharum nen kan bei a. A tha lo lai, a na lai tuam dam lam aiin hleh thlak hlawk a, paih bo daih kan duh zêl mai a nih hi maw.