Daily Newspaper

Turkey in Armenia indo thlawhna a kap thla

4

Armenia chuan an fighter jet pakhat chu Turkish jet in Nagorno-Karabakh region buaina kaihhnawihah a kap thla tiin a sawi.

Armenian foreign ministry chuan Soviet siam fighter jet SU-25 pilot chu Turkish F-16 in Armenian air space-ah a kah hnuah a thi tiin an sawi bawk.

Azerbaijan langsar taka a thlawp thu sawitu Turkey chuan Armenia thusawi hi a hnawl thung.

Ni thum chhung Nagorno-Karabakh region inchuhna inbeihna avangin mi 100 dawnin nunna an chan tawh a ni.

He region hi khawvelin Azerbaijan ram anga a pawm a ni a, mahse, ethnic Armenian te tamna niin kum 1988-94 a Soviet republic ram hlui pahnih tena indona an neih atangin ethnic Armenian te hian an la thunun char char a ni.

Azerbaijan chuan an air force chuan F-16 fighter jet an neih loh thu an sawi fo tawh a, mahse, Turkey-in a nei thung.

Nithum vel kaltaa Nagorno-Karabakh inchuha inbeihna chu Armenia leh Azerbaijan inbeihnaah kalin an inkap ta fo bawk a. Buaina chhuah chhanah an inpuhtawn ve ve bawk.

Turkey chuan langsar takin Azerbaijan a thlawp thu a sawi a. Russia, Armenia a military base nei leh Azerbaijan thian ni tho chuan inkahhaina a rawt chuk chuk thung.

Armenian Defence Ministry thupuangtu Shushan Stepanyan chuan Armenian SU-25 chu kahhtlak a nih thu sawiin Turkish F-16 chu Armenian air space chung 60km a thukah a luh thu a sawi a. Turkey chuan ‘dawt muhlum’ tiin a sawi thung.

“Armenia te hian an luah mek ram atang hian an insaseng nghal vat tur a ni” tiin Turkish President Recep Tayyip Erdogan thachhagn dawltu Fahrettin Altun chuan a sawi.

Jet kahthlak a nih finfiahna engmah pholan a la awm lo va, Azerbaijan chuan Armenia chu thlawhna kahthlak a ni ngei tih finfiahna pholang turin a phut bawk.

Nagorno-Karabakh ah hian inkahna nasa tak thlengin, he region a thuneitute chuan an sipai 87 in nunna an chan tawh thu leh mi 120 chuangin hliam an tawrh tawh thu an sawi a. Intihbuaina hi Pathianni kalta atanga intan a ni.

Azerbaijan lamah nunna chan 400 vel awm tawha sawi bawkin indo thlawhna pakhat, helicopter pali leh tank thahnem tak an tihchhiat thu an sawi bawk. Azerbaijan chuan an sipai thi zat an sawi lo va, civilian 12 in nunna an chan a ti thung.

A bulthut?
Kum 1988-a Soviet rorelna tawp dawn lam khan Azerbaijan sipai leh Armenian inlakhran duh te chu indona rapthlak tak kalpuiin chu vang chuan Nagorno-Karabakh chu ethnic Armenian te kutah kum 1994 a inremna siam angin a awm a.

Kha indonaah khan mi sang tam takin nunna chan in ethnic Azerbaijan tamtak te chu an in leh lo tlansanin an tlanchhia a ni.

Tunah chuan de facto independent region niin Armenia a thuk taka innghat a ni a. Mahse, UN member a ni lo va, Armenia pawhin independent anga a pawm a ni chaung lo. Azeri territory chhehvela ram zau tak chu Aremnian thununnaah a awm bawk.

Tun thlengin inbiakna neih a ni chungin inremna tluantling siam theih a la ni chaung lo va, helai region buaina hi post-Soviet Europe ‘frozen conflict’ an tih zinga mi a la ni ta reng.

Karabakh hi Russia-in Azeri thumal a sawi dan niin a awmzia chu ‘black garden’ tihna a ni a, Nagorno hi chu Russian tawnga ‘tlangram’ tihna a ni. Ethnic Armenians te chuan an region chu tun hmaa Armenian tena an sawina Artsakh tih an duh thung.

Kum tam tak chhung chu inkahhaina bawh chhiaa inbeihna a thleng fo va. Armenia hi lanlock niin Tukey leh Azerbaijan te nena ramri khar avangin economic lamah harsatna namen lo a tawh phah fo tawh thin.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy