Turkey-in Finland Nato member nih tumna remti

Finland chu Turkey parliament in member nih an dilna a pawm hnuah Nato member 31-na tur a ni dawn ta a.
A hmain Turkey chuan Finland in West defensive alliance zawm a tumna hi a thla a thla tikhawtlai tawhin Nordic ram chu ‘firfiakte’ thlawptu tiin a sawi a ni.
Nato member ni tur hian member ni sa tena an pawmpui thlap vek ngai a ni a. Nikuma Finland ruala Nato member nih dil tho Sweden dilna erawh ‘firfiakna’ kaihhnawiha puhna avangin Ankara chuan a la dang lui tlat thung.
Finland chu Nato summit neih hmasak leh ber tur July thlaa Lithuania a neih turah lak luh a ni dawn a ni.
Turkish parliament-in vote hmanga an tihchian hnuah Finnish sorkar chuan Nato zawm chuan an ram security tichakin, Baltic region leh Northern Europe lamah ngelnghehna leh himna a thlen dawn tiin a sawi a.
“Allies kan nih angin security ka pein kan dawng bawk ang. Kan inveng tawn ang a. Finland chuan tunah leh nakin hunah pawh Sweden dilna chu a thlawp tlat ang,” tiin Prime Minister Sanna Marin chuan a sawi.
Turkish President Recep Tayyip Erdogan chuan Finland dilna hi March thla tir lam khan a pawm tawh a, Turkish security ngelnghehna atana hma an lakna chu a fak thu a sawi a. Mahse, Sweden lakah erawh la khauh tan rengin Kurdish militant te humhimah leh Stockholm kawtthlerah lungawilohna zalen taka an kalpui remtiah a puh a ni.
Ankara-in Finland member nihna a pawmna hi tun hnaia Nato history a hun chhinchhiahtlak ber a ni a. Finland hi ram lian lo tak Russia nena ramri 1,340 km intawm an ni a, Western Europe-a hmun pawimawh ber anga ngaih niin Russia-in Ukraine a run hnuah ‘neutral’ ram a nih rengna chu bansanin Nato zawm a dil ta a ni.
Sweden pawhin hun rei tak neutral ram a nihna chu bansanin Russia-in Ukraine a run hnuah Nato zawm a thlang a, a dil zui nghal bawk a. Mahse, Sweden hi chuan a thenawm Finland ang lo takin Russia nena ramri intawm an nei ve lo thung.
Nato hian founding principle an neihah principle of collective defence a tel a, a awmzia chu Nato member ram pakhat te pawhin beihna an tawk a nih chuan Nato alliance pum beihna anga ngaih a ni.
Russian President Vladimir Putin tan chuan Finland-in Nato a zawm hi strategic taka hnungtawlh turuna a ni thung a. Nikum khan Ukraine a runna chhan pakhata a sawi chu khawthlang ram tena Nato ram an zauh zel danna a ti a. Mahse, a beisei loh lamin thil a kal ta zawk a ni.
Tihian Finland hi Baltic Sea leh a chhehvela Nato zawm ram pasarihna a ni ta chiah a, Russia-in tuipui St Petersburg atanga a pawh theihna leh Kalininingrad enclave te atang bakin pawhna a nei thei dawn ta lo.
Russia chuan Finland thutlukna siam hi sawisel nghalin Russophobic hysteria behchhana fuh lo taka kalpui a ti a. Mahse, a nihna takah chuan Finnish mipui nawlpui te chuan Russia-in Ukraine a run avangin Nato zawm hi an duh phah thung.
Opinion poll lakah Finns mipui 80% te chuan Russia-in Ukraine a run hnuah Nato zawm hi an thlang tia tarlan a ni a. Finland chuan Nato a zawm chuan Russia-in a run theihna nasa takin a tlahniamah an ngai a ni.