February ni 6 Turkey ram lirnghinga bo Ghanaian footballer Christian Atsu chu hun engemawchen a chin hriat a nih loh hnuah Hatay khawpuia a chenna apartment building chim karah thia haichhuah a nih thu karliamta Inrinni khan a Turkish agent chuan a nemnghet.
Ghana winger Atsu hi Tur-key ram hmar lam club Hatays-por chuan nikum September thla khan senglutin, Turkey a pan hma hian English Premier League club pathum Everton, Chelsea leh Newcastle United tan a lo khel tawh a, kartawp Pre-mier League lamah a khelhna club hluite hian Atsu sunna hun an buatsaih nghe nghe.
Kum 31 mi hi lirnghin hnu khan a chin hriat a ni lo a, hnu lawkah a khelhna Hatayspor official pakhat chuan in chim kar atanga dama chhanchhuah a nih thu sawi mah se chu thu chuan belhchian a lo dawl lo a, tunah a thih thu an nemnghet ta a ni.
Inrinni khan a agent Murat Uzunmehmet chuan Hatay khawpuia chanchinbumite hnenah in chim kar atanga Atsu ruang phawrh a nih thu leh a thihna hmunah hian a phone pawh chhar a nih thu a sawi.
Inrinni vek khan Ghana Football Association pawhin chawlhkar hnih dawn hnua Atsu ruang hmuhchhuah a nih thu hi an puang ve bawk.
Atsu hian February ni 5 khan Super Lig match-ah a club vawn lai chakna goal thunin, Zir-tawpnia Hatayspor manager sawi dan chuan lirnghin hma darkar tlemte la awmah khan a chenna Turkey chhim lam thlawhchhuahsan tur a nih laiin zinchhuah a thulh a, chhiatnain a tlakbuak zui ta a ni.
Twitter lamah Turkish top-flight club Hatayspor chuan an player sunna leh thlahna thuchhuah siamin, Atsu chu an hriatreng tawh tur thu leh thlamuang taka chawl tura an duh thu an sawi a, an player duhawm tak thihna avanga an lungngaihna chu tawngkama sawichhuah mi rual a nih loh thu an tarlang tel.
A club hlui Newcastle pawhin thuchhuah siamin, “Talented player leh mi special bik a ni a, kan player, staff leh supporter zawng zawngin kanhre reng tawh ang,” tiin.
Ram tana match 65 khel tling Atsu hian Ghana chu 2015 Africa Cup of Nations final thlenpuiin, penalty petah Ivory Coast an ngam lo a, ram tana a inlan hnuhnunber chu kum 2019 kha a ni.
Kum 2013 khan Porto atangin Chelsea a zawm a; loan-a chhuak foin, Vitesse leh Bourne-mouth tan a khel tawh bawk.
London club chuan an player hlui thihna chungchangah thuchhuah siam ve tawhin, “Chelsea chuan Christian-a chhungte leh thiante a tawrhpuiin, he lirnghingin a nghawng zawng zawngte kan hre reng a ni,” an ti.
Turkey leh Syria ram lirnghingah khan mi 45,000 chuang an thi tih nemngheh tawh niin, chin hriat loh tam tak an la awm avangin thi zat hi la pung chho leh tur a ni.
Turkey lirnghinga nunna chan Atsu
