Turkish MP ten Nato member nih Sweden dilna pawmpui thei ta

Turkish MP te chuan Sweden in Nato zawm a tumna chu remtihna an pe thei ta a, tihian Nordic ramin member nih a tumna lamah hmasawnna nasa tak a thleng a ni.
Sweden hian kum 2022 khan Russia in Ukraine a run hnuah Nato member nih a dil a, mahse, Sweden in Kurdish seperatist te a thlawp tia sawiin Turkey chuan a pawmpui duh lo a ni. President Erdogan chuan MP te thutlukna hi hming a ziah hnan tawh mai dawn a. Tihian Sweden in Nato member nih a dilna la pawm lo awm chhun chu Hungary chauh a ni ta a ni.
Swedish Prime Minister Ulf Kristersson chuan, “Vawiinah hian Nato full member nih kan hnaih tawh hle a ni” tiin social media-ah a tarlang a ni.
Nato Secretary General Jens Stoltenberg chuan Turkey vote chu lawmawm a tih thu sawiin Hungary pawhin a rang thei ang bera an pawmpui a beisei thu a sawi bawk.
Hungary chuan Sweden chu a lo sawisel tawh thung a. Nikum March thla khan Hungarian sorkar thupuangtu Zoltan Kovacs chuan Sweden official-te chu na takin a lo sawisel tawh a. A hmain Stockholm pawhin Hungary sorkar chu EU democratic principle te ngai pawimawh lovah a lo puh tawh bawk.
Mahse, tunah chuan hmasawnna awmin Hungarian Prime Minister Viktor Orban chuan thawhlehni khan Sweidish prime minister chu Budapest-a inbiakpuiah a sawm a, inbiakna chuan inrintawnna a siam thei a ti a ni.
Sweden Foreign Minister Tobias Billstrom pawhin Hungary nen chuan inbiakna neiin sawihona an nei zui zel thei tiin a sawi bawk.
July thla thleng khian Turkey chuan Sweden dilna pawm lo kha a ni a. Mahse, Thawhlehni khan lawmaker-te chuan Swedish membership dilna chu an pawm fel thei ta a ni.
Turkey-in Sweden dilna a pawm duh lohna chhan ber chu Kurdish militant-te a rama khawi angah a puh a, Kurdistan Workers’ Party (PKK) te chu Turkey ina firfiak tia a puante an ni a, PKK te hi EU leh US pawhin terrorist group-ah an puang tho bawk.
Nato member 31 te hian an member nih tum zawm duh an awm chuan an pawm vek a ngai a ni. Pakhatin a pawmloh pawhin remtih theih a ni lo.
Sweden leh a thenawm Finland, tunhma atanga tawha military neutral tia hriat larte chuan Russia-in Ukraine a run hnuah May 2022 khan Nato zawm an dil a. Finland chuan April 2023 khan Nato zawm fel tawhin, hei vang hian Nato tena Russia nena ramri thui tak an neih belh phah a ni.