Sophie Turner leh Joe Jonas te chuan court-a inthen dilna an theh luh hnuah an fate enkawltu nih an inchuh zui a, Game of Thrones star hian a fate UK-a hruai a tum chu Joe-a’n a rem tih loh avangin court-ah a zualko leh a, tunah chuan inremna lailawk an nei thei ta.
Sophie leh Joe te hian fanu pahnih- Willa, kum 3, leh a nau DMJ an tih mai, thla 14 mi an nei a, tuna an inremna lailawkah hian an fate hi Joe chenna US leh Sophie chenna UK-ah te an kar tawn thei dawn a ni.
Court-in an inthennaa chungchang leh an fate enkawl dan tura thutlukna a neih hmaa an inrem lailawkna ang chuan Sophie hian an fanu te pahnih hi October ni 9 atanga ni 21 inkar zawng a awm pui ang a, UK-ah pawh a hruai thei ang a, chumi hnuah November ni 2 thleng Joe Jonas-a’n a awmpui ve leh thung ang. Sophie hian November ni 3 atanga November ni 22 thleng an fate hi a awmpui ve leh ang a, Joe-a’n November ni 23 atanga December ni 16 thleng awmpui lehin, Sophie hian December ni 17 atanga January ni 7 thleng a awmpui ve leh thung dawn a ni.
Turner leh Jonas ten inremna lailawk an nei
