Daily Newspaper

Tut lui bomb-tute lakah FIR thehlut

11

Bomb hmanga Tut luia sangha man chungchangah Mamit Divisional Forest Officer hnenah People’s Conference party chuan first information report a thehlut.

PC Gen. Hqrs. thuchhuak chuan, 2020 November 21-a Phaizau khaw bul Tut luia bomb hmanga sangha mantute man an la nih loh avangin December 7 khan Mamit DFO hnenah hma la tura ngenna lehkha an thehluh thu a sawi.

‘Bomb hmanga sangha man avangin mi tam tak man ni tawhin hrem hial an ni tawh a. November 21, 2020-a Tut luia bomb hmanga sangha man hi a finfiahna tur thlalak pawh tam tak awmin media-ah thehdarh a ni a. Chu mai bakah sangha mantute hian pawisa hial an chawi a. Finfiahna chiang tak a awm chungin tun thlengin sangha beitute hi man an la ni lo. He sangha mannaah hian Mamit bialtu MLA Er. H Lalzirliana a tel nia sawi a ni a. Mipuiin thudik kan hriat nan chhui chian a ngai zual a ni,’ a ti.

Heng avangte hian Mamit DFO hnenah an party elected office bearer zinga vigilance leh legal lam changtu, senior vice president Vanlalruata hmingin chhui chianga dan hmanga hma la tura ngenna hi an thehlut tih a sawi. ‘Bomb hmanga sangha man hi Explosive Act 1884, Mizoram Forest Act 1955, Wildlife (Protection) Act 1972, Biological Diversity Act 2002 leh Mizoram Fisheries Act 2002 kalh a ni a. Kum 7 thleng lung in tan bakah cheng nuai 2 thleng chawi tira hrem theih a ni,’ thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy