Two wheeler ruk ching
hnamdang pali an man
Tunhnaia Aizawl hmun thenkhata two wheeler rukbo kaihhnawihah state dang mi pali man an ni.
Mizoram Police hotute sawi danin, kumin January 18 khan Zuangtui Aizawlah bike – Yamaha R15 V3 rukbo a ni a, Bawngkawn Police Station-ah case ziahluh niin, an chhuizuinaah January 19 – Thawhtanni khan he thila inhnamhnawih ni hriat mi pali – Zakaria Ahmed (19) Karimganj district Assam , tuna Leitan-a khawsa; Noor Ahmed (19) Patharkandi, tuna Durtlang-a khawsa; Babul Hussain (19) Patharkandi, tuna Leitan-a khawsa leh Junil Hussain (19) Karimganj, tuna Leitan Ramthar-a khawsa chu man an ni.
Police-te chhuizuinaah two wheeler dang pahnih – bike Yamaha R15 V4 (MZ-01W 7907) leh scooty Yamaha Ray Z (MZ-01 AD 0258) pawh an kut atang hian man a ni a, heng two wheeler neitute hian anmahni ta, rukbo sak an ni tih an finfiah zui a ni.
Police-in an thu an zawhfiahnaah heng mite hian, 2025 November leh 2026 January inkar khan Aizawlah two wheeler dang pathum – Yamaha R15 V3, Yamaha R15 M leh Yamaha R15 V4 pawh an lo ru tawh tih hriat a ni a, heng bike ho hi Silchar-ah an hralh niin an sawi. Laklet leh tumin Mizoram Police hian an bei zui mek a ni.
Two wheeler ruk ching hnamdang pali an man
