Daily Newspaper

Typhoon vanga nunna chan 375 chuang

26

Super Typhoon Rai-in Philippines a nuai avanga nunna chan mi 375 aia tlem lo an awm tiin Philippines police-te chuan an sawi a. He thlipui hian darkar khata 195 km/h a chakin Philippines chhim chhak lam thliarkar a nuai a ni.

Mi 500 chuangin hliam tuarin mi 56 te chu an chin hriat lohin an awm mek niin local police-te chuan an sawi bawk a. Rescue team-te chuan thlipui sulhnu chu turu tak a nih thu an sawi bawk.

Engtiang chiahin nge chhiatna a thlen tihte chu hriatfiah theih a la ni lo va, a chhan chu thlipui nuai natna ber berte chu biakpawh theih an la nih rih loh vang a ni.

Thlipuiin a ken ruahsur nasa lutuk avanga leimin leh tuiliante chuan harsatna nasa tak a thlen bawk.

“Hmun tam takah power a awm lo va, biak pawh theih an ni lo va, tuithianghlim an tlachham bawk” tiin Phillippines Red Cross, Richard Gordon chuan a sawi a. “Hmun thenkhat chu World War II laia bomb sulhnu ni awm tak angte pawhin a awm a ni” tiin a sawi bawk.

International Federation of Red Cross leh Red Crescent Soceities-te chuan tanpuina leh chhawmdawl nan $22 million an dil nghal a ni.

“Red Cross emergency team-te chuan coastal area-ah chhiatna tawp a thleng an ti” tiin Gordon chuan a sawi a. “Chenna In, damdawi In, School leh community building-te chu pawhthler angin a awm a ni” tiin a sawi bawk.

Volunteer-te chuan mipui engkim chante hnenah chhawm-dawlna awm thei ang ang an pe, tiin a sawi bawk.

Philippines sorkar chuan sipai, coast guard leh fire personnel-te chu thlipuiin a nuai nasat ber berna hmunah hian chhawmdawlna leh chhanchhuahna kalpui turin a tirlut nghal a. Military aircraft leh naval vessel ten tanpuina an phurlut bawk.

Philippines President Rodrigo Duterta chuan vansang atangin thlipui tihchhiat enfiahna neiin Siargao, Dinagat leh Mindanao island-te chu thlipui tuar nasa zualte an ni.

Dingat island governor Arlene bag-ao chuan an region chu typhoon-in lei hrulah a nuai hniam vek tiin a sawi a. “Loneitu leh sangha mantute lo leh lawngte chu phin darhin a awm a ni” tiin a sawi a. “Chenna In kan chan a, kan inchung leh bangte chu lendarhin a awm a, chaw leh tui kan tlachham bawk” tiin Facebook post a siamah a sawi.

Phillippines hian kum tinin typhoon leh thlipui na zual 20 a hmachhawn ziah anga ngaih a ni a. July leh October inkar chhungin a tawng ber thin a, tuna typhoon hi a che tlai thung.

Scientist-te chuan khawvel temperature sang zel mihringin a siamte chuan typhoon-te chu hlauhawm zual zawkin a siam a ni an ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy