Daily Newspaper

Tyson chotu Holyfield

10

Karliamta Pathianni zing mai khan Mike Tyson chuan exhibition come-back-ah Roy Jones Jr hmachhawnin sum tamtak a hlawhchhuak a, kha fight kan thlirliam hnu lawk khan professional huang an luhchilh ve ve laia a hmelma lian Evander Holyfield chuan a beng them sahthlaksak tawhtu Tyson chu exhibition bout-a intawng turin a au zui ve nghal.

Tyson ang bawka heavyweight champion hlui Holyfield chuan, “Chhuanlam a siam theih loh ang. He fight hi kan pahnih inkara thuthlunna leh ka ro awm reng tawh tur atan hlenchhuah ngei a ngai a, khawvelin min nghak reng a, i kuta innghat a ni, kei chu ka inpeih thlap e,” tiin a cho.

Evander Holyfield chuan Roy Jones Jr nen chak zawk puan lohna eight-round exhibition bout khel zo hlim Mike Tyson chu an pahnih inkara a vawithumna atan hruihrual chhunga intawng leh ngei turin a sawm a, a sawi dan chuan Roy Jones nena an inhnek hma khan he sawmna hi a hriattir tawh a, mahse, Tyson khan Jones Jr a thlang ta zawk a ni.

Kum 2011 hnu lama la inhnek leh ta lo Holyfield hian Staples Center, Los Angeles-a khawvel ngaihven hlawh inhnek kha a laka Tyson-a tlanchhiatna bout niin a puh.

Kha inhnekah khan round khat chu minute hnih zel niin, Mike Tyson chunungnung zawkin lang mah se dan anga judge an dahte’n ruat lawk angin draw result an tichhuak a, a hnu lawkah Holyfield-a thu leh hla hriat tur a awm zui ta a ni.

Holyfield chuan, “Kan pahnih inkara a vawithumna atana inhmachhawn tura ka sawmna chu vut laka vawih ang mai a ni ta a, chhuanlam chi hrang hrang bak chhanna dang dawn ka nei lo. Kei min hmachhawn aia kalphung duansa zawh mai tura duan fight a thlan zawk chhan pawh ka hre ta.

“Roy Jones kha Mike-a tan tual-chhung huapa hmachhawn atan chuan a tawk lek a, kei nen chuan intawng ila khawvel huap a ni dawn a, mite’n an hmuh duh chu kan pahnih inkara inhnek ngei hi a ni. Kan inhnek loha tur chhan chhuanlam engmah a awm thei lo a, he fight hi kan pahnih inkara chinfel tur tihchianna a nih dawn avangin a hlawhtling ngei tur a ni.

“Inrinni zan khan kei min hma-chhawn i inpeih thu i sawi a, a nih chuan contract chu ziakin hruihual chhungah ngei inhmu leh ang hmiang, Tyson. Khawvelin chu chu a nghak mek a, i duhthlanna a ni e, kei chu ka inpeih thlap e,” tiin chona tumtlang tak a chhakchhuak.

Kum 1995 daih tawh khan heavyweight champion ropui pahnih Evander Holyfield leh Mike Tyson hi a vawikhatna atan intawngin, round sawmpakhatnaah Holyfield chuan inhnek chhunzawm thei loin Tyson a siam a; kum 1997 khan a vawihnihna atan intawng lehin, chumi tum chuan khawvel barakhaihtu hruihrual chhungah kan hmu a, Tyson chuan Holyfield-a beng a sehthler duai a, kha match-ah khan inhnek chhun-zawm thei loa hnawhchhuah a nih bakah a boxing license pawh chhuh-sak a ni a, a hnuah peklet leh a ni.

Professional boxing chawlhsan ve ve tawh mah se Evander Holyfield chuan an pahnih inkara chinfel tur la awmin a ngai a, a sawi hmangin Jones Jr nen an inhnek hma khan Mike Tyson hi inhnekpuiah a sawm a, a hlawhchham ta rih a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy