Uniform Civil Code chu Mizoram tan a tha loa, centre-ah BJP a sawrkar leh a nih chuan India ram puma hman vek turin a ti loang tih a sawi theih loh tih a sawi.
Zirtawpnia MNF office, Mizo Hnam Runa inkhawmah MNF Political Affairs Committee member K Riachho hian Citizenship Amendment Bill Parliament-ah putluh a nih khan India mipui pahnihin an duh loh laiin, pakhat chauhin a duh a. India mipui kan tam tawh tehreng nen, kan pun belh zelna tur a ni a, inthliar hranna nasa tak a ni, tiin, “Mizoramah pawh NGO zawng zawng nen kan do a, Pu Zoramthanga sawrkar khan Assembly-ah huaisen takin a dodal a, hemi dan hian min huam ta lo a ni,” a ti.
Uniform Civil Code chu Mizoram tan a tha lo tih a sawi a. A sawi mawituten inthliarhranna a awm loa, inpumkhatna, hmeichhia leh mipa intluktlanna a awm theihna tur a nih thu sawi mah se, India rama sakhaw kulmuk tam takin an remti loa, a duh lo pawlin sakhaw zalenna leh hnam tenau zawkte nen inpumkhatna a kalh an tih avangin an sir tluk ta rih a, a duh chuan hman a, a duh lo chuan hman loh, tih a ni a; Uttarakhand-ah chuan an pass tawh a, BJP a sawrkar leh a nih chuan an hmang vek lo ang tih a sawi theih loh, tiin a sawi.
Kum 1986-a state kan nih theihna turin UT laia dan kan hman chhunzawm theihna siam a ni a. India leh MNF inremna dan kha a hlu in, inner line permit kan nei chhunzawm a, inremna thuthlungah Mizoram sawrkar rawn hmasa loin ILP tihdanglam theih loh a ni kha kha a ropui takzet tih K Riachho hian a sawi. “Hetiang dan hi nei lo ila, kan sumdawnna lian zawng zawng hi kan thenawm state-te angin Vai hoin min neihsak vek tawh ang,” a ti.
UCC hi Mizoram tan a tha lo – K Riachho, IAS (Rtd)
