UCC hrechiang loin kan insawithaih

BJP hmalakna tam tak, a bikin Uniform Civil Code chu hrechiang mang loin kan insawithaih vak thin tih BJP an sawi.
BJP Mizoram thupuangtu Lalremsangi Fanai chuan, Uniform Civil Code (UCC) leh Citizenship Amendment Act (CAA) chu engti anga hman tur nge tih zirchiang loin kan insawithaih vak a, CAA hman a nih pawhin North East tribal-te min huam ve loh avangin Meghalaya Lok Sabha MP Agatha Sangma, Mizoram Lok Sabha MP C Lalrosanga te pawhin Bill thlawp zawngin an vote tih a sawi.
“Central emaw state sawrkarin sakhua leh hnam, mihring chengte hman tura dan siam emaw dan thar siam tur hian tribal state-te min huam vek loh Bill pass a awm fo,” a ti.
UCC chu enge a nih chiah tih mipui leh politician te pawhin kan hrechiang lo tih tih sawiin, Mizoramah inneihna, inthenna leh rokhawm thu ah buaina neuh neuh a tam a. Nupa inthenna kawnga India rama inthen tamna ber state kan ni hiala sawi a ni tih Lalremsangi Fanai hian a sawi. Society leh community chhunga inneih leh inthen awlsam lutuk hian khawtlang nun bakah ram than chhohna tur kawngah a tha lo zawngin nghawng a nei nasa thei tih pawh zirchianna lama hmuh a ni, tiin, “Mithiam tam tak chuan India Union ram khat kan nih anga inneih, inthen, rokhawm thu ah dan tlanglawn hmanrual theih tur neih tha tihna atanga UCC hi lo richhuak a ni. UCC hi hrechiang loin kan insawithaih nghal vak a; tuna tul ber chu, research base hmanga zirchian hmasak a, a tul anga chiang felfai taka mipui zirtirna pek hmasak a ni,” a ti.
Prime minister Indira Gandhi hunlaia khauh taka sawrkar laipui hriat loha foreign tanpuina dawn khapna leh hrem theihna, PM Dr Manmohan Singh kaihhruai 2010-a UPA sawrkar hunlaia siamthat, kum 2020-a siamthat lehna – Foreign Contribution Regulation Act (FCRA) 2010 chu Mizo zingah thudik hriat duhlohna a awm fo tih BJP thupuangtu hian a sawi bawk.
FCRA chuan India rama Kristiante chauh emaw Mizoram NGO-te chauh tihtawp anga sawiduh kan awm thin tih sawiin, “FCRA fimkhur zawka kalpui hian India ram chhung NGO zawng zawng a huam. FCRA dawng tur chuan Union Home ministry hnuaia registration (valid licence) felfai tak hmanga dil a ngai a, kumtawpah annual return thehluh zel a ngaih bakah NGO-in a neih hausakna (assets) che thei leh che thei lo zawng zawng report thehluh ngai. FCRA account pawh State Bank of India, Sansad Marg N. Delhi branch chauh hman theih a ni,” a ti.
NGO 20000 chuang chu FCRA rules zawm famkim lo leh a thente chu corruption kaihhnawih vanga licence tihtawp sak an awm a. FCRA hnuaia tanpuina dawn leh a hmanna kawngah fimkhur a ngai hle tih a sawi a ni.
Mizoram State Special Provision Article 371G chu lak bo mai hlauhawm leh him lo tia insawithaih a ni thin tih BJP hruaitu hian a sawi a. Article 370 nena sawizawm an awm tih a sawi bawk. “Jammu & Kashmir history leh Mizote history hi thawnthu hran hlak a nih bakah J&K angin mipui thlan sawrkar ding hleithei lo, mipui ralmuanna awm lo, hmasawnna kal thei lo, law & order kenkawhna tlachhiain President’s Rule-a lut ve fo ni ila, insawithaihna awmze nei a ni thei chauh ang,” a ti.
Congress-in India democracy dinhmun nghing leh BJP a sawrkar leh chuan India ram chu kan inthlang tawh lo anga, kan inthlan pawhin Russia ram inthlang angin a thianghlim tawh loang, tia an sawi thin chu opposition an nih lai apianga an auhla a ni tih a sawi a ni.