Daily Newspaper

UCL 2019-20 Team of the season

12

Sport chanchin thar tarlangtu rintlak tak pakhat; Goal.copm chuan Champions League Team of the Season – 2019-20 a tichhuak a, hun rei tak hnua a vawikhat nan Lionel Messi leh Cristiano Ronaldo ten hmun an chang lova, Bayern Munich in sorkarna an la ve thung.

UCL 2019-20 XI
Singhak : Manuel Neuer – (Bayern Munich)
Kum 2018 Fifa World Cup-ah Germany an chetchhiat vangin si nghak tha zet Manuel Nuer sawiseltu an tam a, inelna lian thama inlan a, chetha turin a hun a liam tawha ngai tam tak an awm. Nuer hi a chuai tawha ngai tam tak zawm bawk mahse Champions League-ah a thatzia a rawn pho lang nawn leh a, si nghak tha berah thlan a ni. Champions League khelh zawh takah khan khelh ruk ngawt goal chhuah miah loh a nei a. Vawi 28 zet save a nei. Save nei tam per cent a lakin pahnihna a ni a, pakhatna chu Ajax si nghak Andre Onana a ni a, Ajax an dam chhung khan Onana hian vawi 15 zet save a nei hman a, save a neih zat hi 77% a ni.

Defenders
RB: Joshua Kimmich (Bayern Munich)
Kum 25 mi Kimmich hi Bayern an champion theih nana thawhhlawk zet mai a ni a. Tlarhnungah a tawh a khirh bakah a thiante goal thun tur a siamchhuak thei riau bawk. Defender tha tak niin, an khingpuite dang chat thei tak a nih rualin goal thun theihna hun tha vawi 28 zet a siamchhuak a, PSG an hnehna goal Kinsley Coman-a tauhluh tak pawh kha a siamsak a ni nghe nghe a, goal hnih a thun ve bawk.

CB: Dayot Upamecano (RB Leipzig)
Team nuapang, team hmasawn RB Leipzig in semi final an luh theih nana thawhhlawk tak pakhat chu kum 21 mi Dayot Upamecano hi a ni. Champions League-ah a chetthat em vang hian club lian zawkte pawhin an ngaihven thar hle a., Goal,com pawhin UCL 2019-20-a player tha zual 11-ah an thlang tel hial a ni.

CB: David Alaba (Bayern Munich)
Bayern Munich an champion theih nana player thawhhlawk tak a ni. Season tir lam khan left-back angin a khel a, hliam an neih vangin centre-back-ah chhawr a ni a, a khel tha zui hle nghe nghe. Austria international hian 85% tackle a hlawhtling a, duels-ah 75% hlawhtling in, 91% zet ball a pass dik bawk.

LB: Alphonso Davies (Bayern Munich)
Rethei taka nun bun tan, refugee camp-a piang leh sei lian Alphonso Davies chuan hun hlimawm leh hlawhtlinna sang tak a chang ta. German champion Bayern Munich player pawimawh a ni a, Champions League-ah an champion theih nan a thawhhlawk hle a, UCL 2019-20 XI-ah a tel phak ta hial a ni.

Midfieders
RW: Serge Gnabry (Bayern Munich)
Arsenal in an duh loha an hnawl hnu Gnabry hi Bayern Munich-ah a hlawhtling a, a hming a chher ta hle. Bayern an champion theih nana player thawhhlawk niin goal kua a thun a, assist vawi hnih a nei bawk. Tottenham lakah hattrick a siam a, London-ah a chetha chuan fak zui a hlawh phah hle nghe nghe.

CM: Thiago Alcantara (Bayern Munich)
Premier League club lian hrang hrangte pawhin an ngaihven mek Thiago Alcantara hi Bayern muallai player pawimawh, an game khaidingtu pawimawh tak a ni. Goal thun lem lo mahse assist vawi hnih a nei. UCL 2019-20 chhung khan vawi 832 zet pass a nei a, 91% zet a pass hlawhtling hial a ni.

Midfielder tha tak Alcantara hian hian Bayern Munich-ah kum khat daih chiah contract a nei tawh a, chhuak mai thei dinhmunah a ding reng. EPL champion Liverpool in an ngaihven a, tun hnaiah Arsenal in an dawr thar ve leh niin sawi a awm bawk. EPL-ah a hmel kan hmu thut thei a, England a pan a nih chuan EPL player hmuhnawm a nih chhhoh ngei a bei-seiawm.

CM: Thomas Muller (Bayern Munich)
A chuai ve tawh emaw tih laiin Thomas Muller hi piang nawn leh ang hrimin a rawn khel tha leh ta hle. Niko Kovac hnuaia chuai hman zet kha Hansi Flick hnuaiah a rawn vul thar leh a, Bundesliga, German Pokal DF leh champions League-a an champion theih nana player tangkai a ni. UCL-ah goal li a thun a, goal hnih a siamchhuak bawk. Goal thun theihna tur siamchhuah kawngah a khelhpui Kimmich leh Manchester City midfiedler Kevin de Bruyne te chiah a chugnah an awm.

LW: Neymar (Paris Saint-Germain)
Final-ah goal thun lovin, a tawp lamah tangulh deuh bawk mahse Neymar thatzia hi chu hmuh hmaih theih a ni lova. PSG in final an luh theih nana player tangkai a ni. Goal thum a thun a, goal li a siamchhuak bawk.

ST: Erling Haaland (Borussia Dortmund)
Salzburg tan tha taka inlan in, kum 19 mi chauh Haaland hian UCL a khelh hmasak pangaah goal a thun zawn vek a, record thar a siam nghal hial. Salzburg tan a chetthat em em hnuin Borussia Dortmund tan a khel tha zui leh zel a, UCL-ah hian vawi riat khel hman in, goal 10 zet a thun a, topscorer ni ta Robert Lewandoski aiin goal a thun thei zawk. Quarter final lut phak lo mahse player tha zual 11 zinga tel hi a phu tak zet a ni.

ST: Robert Lewandowski (Bayern Munich)
Poland striker Lewandoski hi Bundesliga-ah topscorer niin kum tha tak a hmang a, champions league-ah vawi 11 khel in, goal 15 a thun a, topscorer a ni zui leh bawk. Season liam taah khan inelna hrang hrangah goal 55 zet a thun tling a, kum tha leh ropui tak a hmang. Player chawimawina ngaihhluthlawh Ballon d’Or dawng ngei tura ngaih a nih laiin a chetthat kumah ber sem a ni dawn lo teh tlat a, Lewandoski tan Ballon d’Or sem a ni lo tur hi a uiawm in, a vanduaithlak tak zet a ni.

UCL-ah goal 15 a thun bakah hian assist vawi nga zet a nei bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy