Nilai zan khan UEFA champions League khelh chhunzawm a ni a, EPL club lian Arsenal in hnehna an chan laiin Manchester City chu Paris St-Germain lakah an tlawm. Gunners in last 16 an hnaih viau tawh laiin City erawh chu tla thei dinhmunah an ding a, an dinhmun a derthawng viau thung.
Laipui a puak tha
London club lian Arsenal hian Emirates Stadium-ah Croatian club lian Dinamo Zagreb an mikhual a, an mikhual lakah Laipui a puak tha a, si thum fai ngawtin hnehna an chang. Arsenal tan hian midfielder Declan Rice chuan minute hnihna lekah hmahruaina goal a thun nghal. Hma taka goal an thun hian inrintawkna sang zawk leh phurna namen lo tak a pe a, an mualah ngei an khel tha zui hle.
An mualah khel tha zui viau mah se Arsenal in goal an thun belh har viau thung. Goal a luh belh theih loh vang vangin hnuin Kai Havertz chuan minute 66-naah an goal hnihna a thun leh nawlh a, an hmahruaina a tizau. Goal thun belh tuma tan an khawh chiam chungin laipui a puah belh leh lawk thei lo. Goal a luh belh tawh dawn lo emaw tih laiin hun pek belh minute 90+1-ah captain Martin Ødegaard chuan lungthu kim nan Arsenal goal thumna a thun a, a tawp a khar zui ta a ni.
An mualah an chak leh tak vangin Arsenal hian khelh sarih atangin point 16 an hmu a, pathumnaah an kir leh. League round bikah chuan Gunners hian vawi khat khelh chiah an nei tawh a, last 16 lut tluk an ni tawh. League round-a an match hnuhnung bera an hmachhawn tur Girona lakah si tam fe an phur a nih ngawt loh chuan Arsenal hian direct in last 16 an lut ngei dawn. An hmachhawn leh tur Girona hi 31-naah an awm mek a, Arsenal sawp hrep tur chuan thil mak an thlentir a ngai ngei ang.
City an tlawm
Arsenal in awlsam taka Dinamo Zagreb an hneh laiin Manchester City chuan PSG laka an hmahruaina an humhim zo lova, 4-2 in an tlawm. PSG lakah an tlawm leh tak vangin City dinhmun a him lo viau a, last 16 play-off tak ngial pawh khel pha lova tla hang nalh thei an ni mek. Play-off tak ngial pawh an khel phak lo a nih vaih chuan City tan mualphona mualphothlak tak a ni ngei ang.
City hia an len luhna Parc des Princes-ah bul an tan tha a, goal hnih an thun hmasa. Inkhel hmuhnawm takah hian chawlhlawk hmaa goal lut a awm theih loh hnuin second half tir lamah City in goal an thun zawn. Minute 50-naah Jack Grealish chuan hma an hruaina goal a thun a. Hmahruaina goal an thun atanga minute thum hnu lekah Erling Haaland chuan an goal hnihna a thun zui leh zat bawk. Goal thun zawn mah se City hian PSG er let an tuar lova, goal li ngawt an chhuah zawn ta tlat thung.
PSG tan hian Ousmane Dembélé chuan minute 56-naah an si phurh a sut then. Minute li hnu lekah Bradley Barcola chuan goal thunin an si phurh a sut zo. 2-2 a nih hnuin João Neves chuan minute 78-naah PSG hmahruai letna goal a thun a. Hun pek belh minute 90+3-ah Gonçalo Ramos chuan an goal lina thunin, an chakna a nemnghet a, an mualah ngei inlehthalna lian an thlentir.
Club lian pahnih; PSG leh Manchester City te hi UCL season kal meka chetha lo pahnih an ni a. City lehthaltu PSG hian khelh 7 atangin point 10 chauh an la hmu a. City hian point riat chiah an la hmu ve thung. PSG lakah an tlawm vangin City dinhmun a chhe ta viau a, 25-naah an awm mek.
UCL khelh dan phung tharah chuan team 36 ten League round-ah vawi 8 theuh an khel a. Khelh riat atanga point hmusang team pariat ten direct in last 16 an lut dawn a. Team 16 dang ten Last 16 play-off an khel zui ve leh dawn thung. City hian play-off khelh phak hram tumin tan an khawh zui ang.
UCL – Arsenal an chak, City an tlawm
