UCL atangin Manchester United an tla

December 12, Thawhleh zan khan UEFA Champions League group match khelh chhunzawm a ni a, Group A atanga Group D a mi ten group match hnuhnung ber an khel. Last 16 lut thei tura chak ngei ngei mamawh Manchester United chu Old Trafford-ah ngei Bayern Munich hneh lovin an tlawm a, table mawngphah ni chungin an tla.
Chhuak hmasa lamah kan tarlan tawh angin Manchester United hian last 16 luh beisei chhunzawm turin an mualah chak ngei ngei an ngai a. FC Copenhagen leh Calatasaray te inkhel result-ah an innghah tel bawk vangin an chak a nih pawhin goal si thum fai tala chak an mamawh. AFC Bournmouth lakah si thum fai ngawta an mualpho hnuin Bayern Munich lakah insiamtha a, chak ngei an mamawh tak zet. An mualah chak mamawh em em chungin inlan mah se tlawm zawkah an tang leh ta tlat a, an mualpho nawn leh ta a. Champions League Group stage-a point an hmuh tlem ber tum a ni zui nghal hial bawk.
Old Trafford a lenglut Bayern Munich hi group champion ni chiang tawh sa an ni a, United laka an tlawm emaw, an chak emaw in an dinhmun a tidanglam phak tawh lo. Group champion ni chiang tawh mah se hnehna chan ngei tumin an inlan a, chawlhlawk hmain team hlauhawm zawk an ni a, ball pawh an chang tam zawk. United in goal thun mamawh viau mah se Bayern Munich khelin awmzia a nei zawk thung. Chawlhlawk hma hian defender Luke Shaw pet kawh tak chu thin tiphu deuh zawk awmchhun a ni. Chawlhlawk hmain innawr tawn viau mah se, goal thun thei an awm lo.
Chawlhlawk hnu lamah inkhel a hmuhnawm chhunzawm a, chak tumruh tak United an khel tha a, an hlauhawm ta viau. Captain Bruno Fernandes chuan box chhung atangin goal thun theihna hun tha a nei a, goal chungah a petchhuah luah vangin an hun tha a hlah thung. United hial ball chang tamin, hlauhawm zawk ni reng mah se goal an chhuah ta tlat thung. German champion Bayern Munich in fuh zetin an nawr tlang a. Tibuaitu nei lo Kingsley Coman chuan minute 71-naah chiang zetin a pet goal a, hmahruaina goal a thun.
An mualah goal an chhuah vangin United dinhmun a chhe leh zual a, UCL atangin tlak an hnaih tawh hle. Hun tawp dawn hnaih lamah Mason Mount chuan goal thun theihna hun tha nei mah se ball a dawn fuh loh vangin ho lam takin a hun tha a khawh ral. Hun tawp dawn hnaihah German champion in goal an thun belh teuh hle a, Harry Kane chuan uiawm takin a tauh goal lo. Hun tawp thlengin goal dang a luh belh thei lova, United chu an mualah ngei tlawmin, champions league atangin an tla a, Europa League an khel zui phak lo bawk.
English club ropui leh hlun Manchester United hian UCL season kal mekah vawi ruk khelin, vawi khat chiah an chak a, point nga hmuin Group A-ah table mawngphah an ni. Khelh ruk atang hian goal 12 chiah an thun a, goal 15 lai an chhuah. UCL an hmachhawn tawh zawng zawngah point an la hmuh tlem ber tum a ni a, hnuhma duhawm lo zet mai an hnutchhiah thar. Kum 2005-06 season hnuah a vawi khat nan Christmas hmain European competition atanga pet chhuah an ni. UCL an hmachhawn tawh zawng zawngah United hian a vawi ruk nan Champions League group stage an paltlang zo lo va, tun hi an group mawngphaha an awm vawi hnihna a ni.
Group stage-a intum tur pawh a nih lai khan FC Copenhagen leh Galatasaray nen an awm tlan vangin United tan last 16 luh har lo tura ngaih a ni a. Beisei an phak loh em vangin an tla nulh a, table mawngphah an ni ta hial a ni. Premier League-ah an talbuai a, UCL-ah an mualpho zui leh tak vangin manager Erik ten Hag dinhmun a chiang lo leh zual a, Red Devils hian manager thar an nei thuai a nih pawhin a mak lo ang.
Erik ten Hag chuan Bayern Munich nen an inhmachhawn dawn chu a rinlawk dan a nih thu a sawi a, chak thei ni chungin chak ta lo mah se, German champion pawhin an tum anga an khelh theih bik loh thu a sawi. “Kan khel tha a, a bikin chawlhlawk hnu lamah kan khel tha leh zual. Chak thei kan ni a, kan hun tha kan chhawr tangkai zo ta lo thung. Kan tlawm vangin kan hnual em em, mah se khelh tur tam tak a la awm a, Premier League lamah kan insawrbing ang” a ti bawk.
Group A-a inkhel dangah FC Copenhagen chuan Parken-a an mikhual Galatasaray chu minute 58-naa Lukas Lerager goal thun hmangin an hneh a, an group-ah pahnihna niin last 16 an lut. Last 16 lut zo ta lo mah se Galatasaray hian Europa League last 16 playoff an khel chhunzawm ang.