Daily Newspaper

UCL – Bayern in final an lut

13

Nilai zan khan UEFA Champions League semi final khelh zawh a ni ta a, Bayern Munich chuan si thum faia Lyon hnehin final an lut a, Paris St-Germain nen champion nih an inchuh dawn.

Lisbon khawpuia semi final hnuhnung zawk khelhah hian Lyon in bul an tan tha, hma taka goal thun theihna hun tha an hloh bakah hun tha dang an khawhral bawk a, goal thun lovin hun tawp an thleng. German champion Bayern hian an hun tha neih an chhawr tangkai hle thung. Lyon lakah hian Arsenal hnawlhnu Gnabry a chetha leh pek viau a, goal hnih thunin a team a chakpui.

Champion tura rinkai Manchester City hnehtu Lyon hian Bayern lakah beiseiawm takin bul an tan a, goal thun theihna hun tha pawh an nei hma hle. Khel tha tluang tak Memphis Depay chuan player pahnih a tlan pelh hnuin hun tha a hloh va, goal chhungah a pet goal lut thei lo. Hemi hnu hian Karl Toko Ekambi chuan tha taka a khalh kual hnuin tha takin a pet tlang a, goal ban a pet per leh dawp bawk a, Bayern an him nawn leh. Hma taka an hun tha neih hi chhawr tangkai se result danglam dawrh thei tur a nih laiin an vanduai ni a ni a, hun tawp thlengin goal an thun thei lo ta hial nghe nghe a ni.

An khingpui laka goal an chhuah lek lek thin hnuin Bayern Munich tan hun tha a inherchhuak ta nge nge. Chetha tluang tak Serge Gnabry chuan tha zeta a khalh tlang hnuin mawi takin far post-ah a thlawh luta hmahruaina goal a thun ta nge nge. Heta tang hian Bayern hian inkhel an thunun chho tan a, an khingpuite an nawr zui ta hle. Minute 33-naah veilam sir atanga siam tha tak chu Robert Lewandoski chuan a ti goal teuh hle a, a tluk hma hret vangin a goal lo chauh a ni a, heta ball per let leh hi goal hmahruai thuntu Serge Gnabry chuan hnai setsawt atangin chiang zetin a pet goal a, an goal hnihna thunin, si hnih faia hmahruai chungin chawlhlawk an hmang.

Chawlhlawk hnu lamah pawh Lyon hi khel tha zawkah an tang a, goal thun theihna hun tha pawh an nei hmasa zawk. German si nghak Manuel Nuer chetthat zar zovin Bayern hi an him nawn leh thin a, goal an chhuah lo hlauh zel. Lyon lamin an hun tha an hloh leh tak hnuin hun tawp dawnah Bayern an che fuh leh ta nge nge a, ding lam sir atanga ball thlawk tha tak chu Robert Lewandoski chuan tawih zetin a tuah goal a, an goal thumna thun in, an chakna a nem nghet.

German Bundeliga-a top scorer Lewandoski hian UCL season kal mekah goal 15 thunin topscorer a ni mek. UCL-ah hian season khat chhunga goal thun hnem ber chu Critiano Ronaldo niin 2013-14 season-ah khan goal 17 zet a thun a, 2015-16 khan goal 16 a thun a, 2017-18-ah khan goal 15 a thun tling leh bawk. Season kal meka chetha Lewandoski hian goal 15 thun tling tawh in, season khat chhunga goal thun hnem pathumna a ni a, pahnihna leh pakhatnaah inhlangkai a, Ronaldo nih rual turin hun tha a la nei a, PSG lakah goal a thun thei a nih chuan hnuhma tha zawk hnutchhiah belh thei dawn a ni. Poland striker Lewandoski hian season kal meka inelna hrang hrangah goal 55 zet a thun tling tawh a, Ballon d’Or sem loh kumah ber a chetha tak zet a ni.

Bayern Munich hi UCL an khelh hnuhung 10-ah an chak zawn bek a, kum 2015-ah Real Madrid in UCL-a chak zawn rei record an siam chu an nih rual. 2019 Demcember thla hnu lamah tlawm an la nei miah lova, khelh 28 zet chhung chu tlawm nei lovin an kaltluang tawh a ni. Bayern hian season kal mekah UCL goal 42 an thun tling tawh a, season khat chhunga goal thun hnem ber Barcelona goal thun zat 45 chu goal thumin an la phak lo. PSG lakah goal thum an thun thei a nih chuan Barca record nih rual in, hnuhma tha dang an hnutchhiah belh thei dawn a ni. German champion hian UCL final an khelh vawi 11 na tur a ni a, final khelh tam lamah AC Milan an nihrual a, final khel ngun ber leh champion ngun ber chu Real Madrid an ni a, final vawi 16 an khel tawh a ni.

Bayern Munich lakah hnehna chang zo ta lo mahse Lyon rawlthar Rayan Cherki chuan hnuhma tha a hnutchhiah tho thung a. kum 17 leh ni hniha upa niin Champions League knockout stages-a inlan thei naupang ber a ni.

Champions League final hi Inrinni zan khian khelh a ni dawn a, ‘dream final’ ti hiala sawiah Bayern Munich leh Paris St-Germain te an inhmachhawn dawn a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy