Thawhtan zan khan English Premier League-a inkhel awmchhunah Newcastle United leh Leicester City te chu goal awm lovin an inhnehtawk. An mualah chak zo lo mah se Newcastle hian champions league khel tura an mamawh tawk point khat an hmu a. Kum 20 zet hnuah champions league an khel phak dawn.
Champions League khel phak tur point mamawh Newcastle United hian an mual St James Park-ah an khel tha viau a. An mikhual Leicester City lakah ball 785 zet an chang. Tlakhniam pumpelh tuma tan khawh Foxes hi an thunun hneh em em a, goal thun theihna hun tha an nei fo chungin goal an thun thei tlat lo thung. Magpies hian uiawm takin an hun tha an hlah zel a. Goal post tum hnih ngawt an tih per bawk. An mualah chak ngei tumin inlan bawk mah se hun tawp thlengin goal an thun thei lo. An mualah chak zo lo mah se point khat an hlawhchhuah vangin Newcastle hian an tum ram an thleng a, kum 20 hnu zetah champions league an khel phak dawn.
Leicester City laka point khat an hmu hmang hian Newcastle hi panganaa awm mek Liverpool aiin point liin an sang a, Pathianni zanah chak lo pawh ni se palina aia hniamah an awm thei tawh lo. Champions league an khel phak dawn ta reng mai chu mumang ang mai a nih thu Magpies manager Eddie Howe chuan a sawi a. Howe hian top 4 huang luah chunga season khar chu season tir khan tum pawh an tum chhin ngam loh thu a sawi bawk.
UCL khel tur Newcastle
![](https://theaizawlpost.org/wp-content/uploads/2023/05/new.jpg)