Daily Newspaper

UCL khel tur United leh Chelsea

10

English Premier League 2019-20 season chu pathianni zan khan khelh zawh a ni ta a, Manchester United leh Chelsea te chuan fiahna hautak paltlang in, champions league an khel phak dawn. United hian khualmualah si hnih faiin Leicester City an hneh a. Chelsea in an mikhual Wolves chu si hnih faiin an hneh ve bawk.

A hunah United
Manchester United hian danglamna mak tak an nei a, team te zawk leh nem zawk hneh loh khut ching mahse team lian an chai thei hrep zel a, chak an mamawh lai taka chak thin, boruak sang leh hun pawimawha chetha tak thin team huaisen an ni. He an ze ropui tak hi King Power stadium-ah an lantir leh a, ‘United nge nge’ tih an hlawh thar leh. Inkhel pawimawh zetah phu takin hnehna an chang a, pathumna ni chungin season an khar.

Season tir lam leh a laihawl thlenga khel tha chho tak, Lockdown hnu lama khelh that harsat Leicester City hian top 4 huang luah turin United lakah chak ngei ngei an mamawh a, chak pawh an tumruh hle. Hnehna chan ngei tumin an mualah an inlan a, an khel pawh a tha chho viau. United tan pawh chak emaw, point hlawhchhuah tal emaw a pawimawh hle tho bawk a, UCL khel phak turin an tlawm a thiang bik lo. Team hnihte goal thun tumin an innawr tawn nasa hle a, inkhel hmuhnawm tak a tling.

Inkhel hmuhnawm takah hian goal a lut lawk thei lo, Foxes in an nawr na mah zawk a, Vardy tauhin goal bar a per hlauh chu United tan vanneihna a tling. Foxes nawrna ata an him thei hram hram zel a, goal thun zawkah an tang ta nge nge. Minute 71-naah Leicester City in tul lovah ball an inpe kual vak vak a, an lamah ball a chawk rei hrat. An tihsual chu United in an hrem zui nghal chat a, chak taka ball tlanluhpuitu Anthony Martial chuan penalty a hlawhchhuak. He penalty hi Bruno Fernandes chuan chiang zetin a pet goal a, hmahruaina goal a thun.

Foxes hian an si phurh sut ngei tumin thapui an thawh zui a, goal thun an tum luatah tangulh in, an chesual nawn leh. Hun pek belh minute 90+4-naah si nghak Kasper Schmeichel chuan Jesse Lingard a pet per ringawt a, Lingard hian ball um tlangin goal ruakah awlsam takin a pet goal a, an chakna a nem nghet. Lingard hian EPL 2019-20-a a goal hmasa ber leh hnuhnung ber chu Foxes lakah hian a thun a, a mak dangdai ve em vangin hriat zui a hlawh hle nghe nghe. Chak mamawh em em Foxes chuan goal an thun ve thei ta lova, champions league khel phak lo chiah chiah turin pangana an luah zui ta a ni.

February ni 1 thleng kha chuan United dinhmun a la chhe em em a, pathumna ni mek Leicester City aiin point 14 zetin an la hniam zawk. An player thar Bruno Fernandes chuan rawn chawk phurin an chak chho ta mawlh mawlh a, tlawm nei lovin an kaltluang deuh ta zat zat. Champions League khel phak lo tura ngaih tawh kha pathumnaah hial an inhlangkai leh ta a, an hmasawnna duhawm tak hi champion lawm taka lawm phu a ni. Hetihlai hian Leicester City erawh chu top 4 huangah ni 325 zet an awm hnuin pangana niin season an khar ta tlat thung.

United captain Harry Maguire chuan EPL 2019-20-ah khan United game zawng zawngah a inlan kim vek a, si nghak ni lo zingah Gary Pallister hnu lamah United tan season tluana inlan kim vek thei awmchhun la ni a, Gary Pallister hi 1994-95 season-ah khan EPL-ah United tan a inlan kim thap a ni.

Chelsea an chak
United aia chak mamawh nasa leh zual Chelsea chuan khel tha tluang ang reng tak Wolves chu Stamford Bridge-ah an mikhual a, si hnih faia hnehna changin palina niin season an khar.

Stamford Bridge-a inkhel hmuhnawm takah hian Chelsea hian chawlhlawk hmaa goal hnih an thun an chhawr tangkai a, hnehna pawimawh tak an chang. Chelsea tan hian minute 45+1-ah Mason Mount chuan hmahruana goal a thun nawlh a, minute 45+4-ah Olivier Giroud chuan an goal hnihna a thun belh zui leh zat bawk. Chawlhlawk dawn tepa an goal thun hi an chakpui a, champions league khel phak turin an inhlangkai zui ta a ni.

Wolves laka Blues goal hnihna thuntu Giroud kha kum 33 mi a ni tawh a, Wolves laka goal a thun chiah khan EPL a hmachhawn hnuhnung pangaah goal a thun zawn ta chiah bawk. EPL ah a zawna khelh nga chhunga goal thun zawn thei upa ber a ni a, kum 32 mi ni chunga khelh nga chhunga goal thun zawn thei upa ber lo ni tawh Jamie Vardy record a thaichhe ta chiah. Vardy hian a record siam pakhat hloh bawk mahse EPL topscorer ni thei upa ber record thar a siam thar ve leh thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy