UD&PA minister K Sapdanga hoin Ningani zan khan UD&PA department official-te leh Aizawl Municipal Corporation corporator thlan tharte chuan zanriah an kil hoa, Aizawl khawpui enkawlna kawngah chak taka thawhho tlan zel an rel.
Powerpoint presentation hmangin khawpui enkawlna atana Swachh Bharat Mission 2.0 tangkai zawka hman dan tur leh AMC atanga Solid Waste Management Rules thar tha taka zawm a nih theihnana hma an lak tawh dan leh hmalak zel dan tur sawiho a ni a. Bawhhlawh reng reng chi li-ah thliarhran a ngaih tawh dawn avangin tha taka mipui zitirna kalpui chhunzawm zel nise, an ti.
Minister chuan state sawrkar hmasate leh AMC-a roreltu hmasaten hma an lakna azarah Aizawlah rorelna mumal a awm chho zel tih a sawi a. AMC-a roreltu tharten inenkawlna felfai leh dinhmun sang zawkah an hlankai ngei a beisei tih a sawi. AMC leh department thawktute tha taka thawk hoa, team work tha tak kengkawh turin a fuih a. Aizawl himna atana tuiluankawr siam mek – Storm Drain Project tangkai taka kalpui a nih theihnan thawhho a tul tih a sawi a ni.
AMC chu state sawrkarin mawhphurhna lian zawk pek zel an duh tih a sawi bawk.
Aizawl mayor H Lalremtluanga chuan UD&PA minister hmalaknaa AMC leh UD&PA ten thawhhona awmze nei leh tha an nei thei dawn nia lang chu lawmawm a tih thu a sawi.
UD&PA leh AMC inhmukhawm
