Uganda parliament chua mawngkawhur te dan bawhchhia tih theihna tur bill a pawm fel ta a. He bill hi President Yoweri Museveni an hming ziah hnana a pawmpui a nih chuan mawngkawhur te chuan rei tak lung in an tanphah thei dawn a ni.
He dan ang hi chuan thian te, chhung te leh vantlang mi te chuan neih inang inkawp same-sex relationship a inhnamhnawih te chu thuneitute hnenah an hriattir tur a ni a.
Mawngkawhurna kaihhnawih thil tin te hi African khawchhak lam ramah hian dan kalh ni sa tawh a ni a. He bill erawh hi chuan mihring chu an sexual identity hmangin hremna a lekkawh thei dawn thung a ni.
He bill hi tun thla tir lam khan pharh tawh niin Uganda parliament ah member tam ber ten thlawpin pawm fel a ni zui nghal a.
Tunah chuan president Museveni hnenah thlen niin a duh chuan a veto in a hnial thei a, a duh chuan pawmin dan a ni zui thei bawk thung.
He bill hian mi tu pawh naupang rukbo emaw leh mawngkawhurna lam kaihhnawiha inhnamhnawih thiamloh chantir te chu dam chhung lung in tang thei tura hrem tur a ti bawk a.
Mimal leh pawl te pawh LGBT right activists emaw pawl te sum hamnga pui, an thu leh hla auchhuahpui emaw pro-gay media material leh literature pechhuak hrim hrim te pawh hrema lung in tantir theih an ni bawk.
Uganda a LGBT mi leh sa leh activists te chuan ram chhungah mawngkawhur te huatna a nasa sa tawh tia sawiin taksa leh online hmang pawha diriam an tawh nasat sa tawh thu sawiin tuna dan thar siam phei hi chuan nghawng natak a nei dawn an ti zui bawk.
Kum 2014 khan Uganda constitutional court chuan tun ang deuh chiaha dan siam LGBT community te laka khauh zawka chetlak tumna chu a lo hnawlsak tawh thung a. Court in a hnawlna chhan a sawiah parliament in mumal in a pawm lo a ti a, he dan hi khawthlang ram te chuan an duh lo hle thung.
Neih inang inkawp hi African ram 30 chuangah khap a ni a, heng ramah te hian conservative religious leh social values thuk taka la kalpui a ni.
Uganda-ah neih-inang te chep zual ang
![](https://theaizawlpost.org/wp-content/uploads/tap_logo-min-large.jpg)