Manipur-a ui a hri tuartu tia sawi video mak tak tak hmuh tur a awm a, thuneitu lam chuan Mizoram tan chiaina tur a awm lo tih an sawi.
Mizoram thenawm Manipur-ah ui a hri (rabies) a leng a, Mizoramah pawh hei vang hian ui khuahkhirhna dan lekkawh a nih bakah Aizawl district magistrate leh Serchhip district magistrate-te chuan Manipur atanga ui lakluh an khap mek. Mizoramah chuan he hri hi hmuh a ni rih lo.
AH&Vety department hotute’n ui a hri hi tun hnai, Manipur-a a len hnuah Mizoramah hmuh a la ni lo tih an sawi a, rinhlelhawm tia report pawh a la awm lo tih an sawi. Tun hma deuhte chuan hmuh a lo ni tawh a, rinhlelhawm case pawh a lo awm tawh a, tun hnaiah erawh chutiang chu hriat a ni lo tih an sawi.
Ui a hri hi tun hnaia hrileng hi leng chum chum chi a ni lo a, Covid-19 leh ASF te anga inkai darh chum chum theih chi a ni lo tih an sawi.
Tun hnaiah ui a hri danna (rabies vaccine) la an pung a, tun karah an pung tih an sawi a, ui vulhtute’n an ngai pawimawh tih sawiin, a hma pawhin Mizorama ui vulhtute’n hri danna hi an ngai pawimawh hrim hrim nia a lan thu an sawi. Chutih rual chuan infuih reng a ngai a, kum tina lak a that thu te an sawi bawk. Department pawhin vaccine hi a ngai pawimawh tih an sawi a, project-ah a lo awm lo a nih pawhin sum awm thei ang ang hmangin an ngaihtuah thin tih an sawi.
Ui a hri hi mihring leh ran inkai chhawn theih natna (zoonotic desease) hlauhawm a nih thu an sawi a, a lan hun chhung pawh ni sarih atanga kum khat tih ni mah se kum 10, kum 20 hnua lang te pawh a awm thei tih sawiin, ralkhel lova fimkhur a that thu an sawi.
Ui a hri vanga ralkhel lo turin chah
