Ukraine beihna avangin Sochi oil depot a kang
Russia huam chhung, Black Sea-a chawlh hmanna hmun, Sochi khawpuia oil depot bula nasa taka kangmei chhuak chu Russian thuneituten Ukrainian drone-in a beihna vang niin an sawi.
Sochi-a a bul hnai thlawhna tumhmunah thlawhna luh leh chhuah khap rih a ni.
Krasnodar Region Governor Veniamin Kondratyev chuan Telegram-ah drone puak darh themin fuel tank fuhin a kang a, a thelhtu 127-in an thelh mek tih a sawi.
Hetih lai hian Russian missile-in Ukraine chhim lama Mykolaiv khawpuia chenna in leh vantlang hmunte a fuh niin tual chhung thuneituten an sawi ve bawk.
Russian sipaiten khawpui an beih mek zelah hian civil mi pasarih velin hliam an tawrh phah a. Ukraine-a State Emergency Service chuan mi pathum chu damdawi inah enkawl an ni tih a puang.
Russian thuneitute chuan Sochi refinery fuhtu drone hi kartawpa Ukraine-in nasa taka a beihna zinga pakhat a nih thu leh Ryazan, Penza leh Voronezh khawpuite an beihna a nih thu an sawi a. Voronezh governor chun drone pakhatin a fuh avangin mi paliin hliam an tuar niin a sawi.
Russia-a defence ministry chuan an air defence-ten Inrinni zan khan Ukrainian drone 93 an kap thla a, heng zinga 60 hi Black Sea region-ah a nih thu an sawi.
Ukraine-a air force pawhin Russia hian drone 83 emaw, drone 76 leh missile pasarih hmangin an kap ve niin an sawi a, heng zinga 61 chu an kap thla a. Drone 16 leh missile parukin hmun riat a fuh thung niin an sawi.
Kar liam taah khan Russian beihna avangin Ukraine-ah mi an thi nasa hle a, heng zingah hian Ningania Kyiv beihnaa mi 31 vel an thihna a tel.
Drone 300 chuang leh cruise missile hmanga kah niin Ukrainian thuneitute chuan sawiin February, 2022-a Russia-in a rûn hnua an khawpui bera thihna a thlen tam ber tum niin an sawi.
Nasa taka beihna an tawh hnuah Ukrainian President Volodymyr Zelensky-a chuan ram liante chu na zawka hrek turin a ngen a. Hetih lai hian US President Donald Trump-a chuan Ukraine laka Russia chet dan demin Moscow hrekna na zawk a thleng dawn tih a sawi.
Ukraine beihna avangin Sochi oil depot a kang
