Ukraine-in a hma thei anga Trump-a leh Zelensky-a inbiak duh

Ukraine-in a hma thei anga Trump-a leh Zelensky-a inbiak duh
Ukraine-a security chief chuan an rama indona kal mek titawp tura indawr mek a nih laiin President Volodymyr Zelensky-a’n tun thla chhunga ‘a hma thei anga’ US tlawh theihna siamsak a nih an beisei tih a sawi.
Security Council chief Rustem Umerov-a hian Thawhlehni khan US leh Ukraine chuan Geneva-a inbiakna neih tawhah ‘inremna an sawihova a pawimawhah ngaihdan thuhmun an nei’ tih a sawi.
White House chuan Trump-Zelensky inbiak chungchang hi engmah an la sawi ve lo.
Hetih lai hian US Army Secretary Dan Driscoll-a chuan Abu Dhabi-ah Russian aiawhte a bia a, tute nge Moscow hian a tirh tih erawh hriat a ni lo.
Umerov-a chuan team chuan Zelensky-a’n US-ah President Donald Trump-a ‘November chhunga a hma thei ang bera tlawha rahbi hnuhnung rapa inremna siam turin’ hun siamsak a nih theih nan an buaipui tih a sawi.
A hmain US thuneitu, Driscoll-a nena Abu Dhabi-a zin chuan Ukraine-in muanna tura rawtna a pawm a, a kimchang erawh a sawi lo.
US Secretary of State Marco Rubio-a chuan Pathiannia Geneva-a an inbiakna kha a tawp tifel turin sawiho an la ngai niin a sawi.
Ukraine leh Russia hian inkar zau tak la neiin Kyiv-in a pawm theih chu Kremlin-in a pawm ve theih beiseina a sang lo hle.
Kyiv leh Europe-a hruaitute chuan kar hmasaa US-in point 28 nei inremna kalpui dan tur a rawt chu an duh lo hle a, Russia tana tha lutuk niin an sawi.
UK, France leh Germany chuan rawtna an nei ve a, hetah hian Russian-ten an luah laite an neihna tur a tel lo va, Ukraine-in sipai tam zawk a neih theihna tur a tel a, Ukraine-in Nato a zawm theihna tur erawh a tel lo.
Thawhtanni khan Zelensky-a chuan rawtna 28 awm siam danglam chu tha a tih thu a sawi a. Hetih lai hian Kremlin thuneitu chuan tihdanglam hi a hnawl ve thung.
Abu Dhabi inbiaknaa tel lo, Russian Foreign Minister Sergei Lavrov-a chuan Kremlin-in rawtna siam danglam leh chu an la hmu lo tih a sawi a, Moscow chuan August thlaa Trump-a leh President Vladimir Putin-a an inbiak tuma an sawite a awm em tih an en dawn tih a sawi.