Ukraine in hmasawnna hmu zel ti

Ukraine general chuan Ukraine chhim lama Russia defence pawimawh leh hmatawng ber chu an chhutchim tak thu a sawi.
Ukraine hian June thlatir lam atang khan Russia nawrlet beihpui a thlak tan a. Frontline 965km vel zeta thuiah hmun thumah beihpui a thlak a ni.
Heng zingah hian chhimchhak lam khawpui Zaporizhzhia chu pawimawh bera ngaih a ni a. Sea of Azov hnaih niin hlawhtling taka an la a nih chuan Russian supply line Russian city Roxtov-on-Don leh Crimea thlunzawmtu an titawp thei a ni.
Mahse Zaporizhzhia region leh a chhehvel Robotyne leh Verbove khua tihlohah chuan Ukraine sipai tena an hmasawnna liantham hmuh tur a la awm thei vak lo thung.
Ukraine hian Russia supply route lian ber a tih chhiat vek chuan kum 2014 atanga a awp tawh Crimea enkawl chu Russia tan chuan harsa tak a nih phah dawn a ni.
Harsatna tam tak an paltlang hnuah Ukrainian sipaite chuan southern front lamah Russia defensive structure te an hnaih tawh hle a. Verbove leh a chhehvelah phei chuan Russian defence chu pal mai thei dinhmunah an ding tia sawi a ni bawk.
Mahse heng hmun hi Ukrainian infantry te chauhin la thlengin Ukrainian armoured column te chuan an la thleng lo thung tia sawi a ni bawk.
Heng thil hi Moscow chuan a thleng dawn tih hre lawk thungin chuvang chuan khawvela defence layer turu ber a siam lawksa tia sawi a ni thung a. Russia chuan harsatna tam tak paltlang tur tench, bunker leh minefield te siamin an inveng nasa hle thung.
Heng Russian inkhuarna te hi Ukraine chuan June thla khan a bei tawh a,a hlawhchham chiang hle a ni. Khawthlang ram tena ralthuam thapui pui an pek te pawhin awmzia a nei lo va, nunna chan tam tak awmin an inhnuhdawh phah tawh a ni.
Kyiv chuan Russia in an pal tura chilpuah bomb a kam te chu zan lamah an thianfai tia sawi niin heng avang hian duh angin hma an sawn chak thei lo tia sawi a ni bawk a. Chutihlaiin thlasik intham tan nen hun an nei rei lo hle tawh bawk.
Ukraine tank leh armoured vehicle te chu Russia mine, drone leh anti-tank missile te lakah dinhmun derthawng takin an awm reng zawk tia sawi a ni bawk.
“Tuna Ukraine tena harsatna an tawh ber chu sipai tam zawk an tirhluh theih nana hmun awl zauzawk siam a ni” tiin Dr Marina Miron, King’s College London War Studies Department chuan a sawi.
Russia hian sipai a tirhluh belh a, he indona tual zawl hi inthlak danglam thei niin Russia hian Ukraine lak tawh te hi a la let leh thei tiin a sawi bawk.
Russian drone te elite airborne forces, VDV te chuan Verbove khua an hnaih hle tih kan hria a. Hei hi Ukraine hmalakna kalzel danchahna tura an hmalak tumna niin a lang tiin a sawi bawk.
“Indona tualzawlah pawh Russian force te chuan Ukrainian forces te hmalam pan tur an la dang chat thei zel” tiin Kateryna Stepanenko, Russia analyst, London-based think tank, RUSI chuan a sawi bawk a ni.
“Heng artillery fire, drone strike piah lamah hian Russian force te chuan electronic warfare hrang hrang hmagin Ukrainian signals leh drone te tihbuai tumin hma an la reng bawk” tiin a sawi bawk.
Mahse thla thum chuang zet nasa taka beihpui an thlak tawh hnuah Russian force te chu an chau tawh a, Ukraine sipai te chuan tuna Russian defence la awm te chu an chhuchhe thei tho thung. A bik takin Tokmak khua an la a nih chuan Russia in rail leh road supply Crimea pek nan bera a hman te chu an dangchat thei ang tiin a sawi bawk a.
Chutianga Ukraine a hlawhtling a nih chuan indona chu a tawp mai dawn tihna ni lovin kum 2024 chuankai puiin mahse Moscow chu nasa takin a tawrh tir dawn thung a ni tiin a sawi bawk.
Kyiv tan erawh hmanhmawh thlak niin hun reilote hnuah khawchin danglam tawh dawnin hmalakna a chak thei tawh dawn lo thung. Chumi piah lamah US presidential election hnai tawh bawkin Republican tena chakna an chang a nih chuan US in military support a pek chu a tlahniam duai ang tih a ni bawk.
President Putin chuan chungte chu a hre vek a, chutihrual chiah chuan Ukrainian te pawhin counter-offensive an neih chu tihhlawhtlin thuai an mamawh tih an hre bawk tia sawi a ni bawk. Hei vang hian Ukraine chuan theihtawp chhuahin counter-offensive chu a kalpui a, mahse, hma a sawn chak thei lo thung.