Ukraine indo tihtawp nan theihtawp kan chhuah – Trump-a palai

Ukraine indo tihtawp nan theihtawp kan chhuah – Trump-a palai
US President Donald Trump-a special envoy Keith Kellogg-a chuan inremna a awm theih mai loh rinna leh palai hna thawhin awmzia a awm lo nia a lan mek laiin Thawhtanni khan kum thum chhung Russia leh Ukraine inkara indona awm tawh tihtawp tumin ‘rim takin an thawk’ tih Kyiv-ah a sawi.
Kellogg-a chuan thuneituten ‘hma lam an pan zel’ tih a sawi a. Ukraine-in nakin zela Russia beihna laka a him theihna tura ‘himna tha tawk’ siam tel a phut pawh a tak thlentir turin an bei zel tih a sawi.
“Hna thawh mek zel a ni a, hmasawnna pawh a awm,” tiin Kellogg-a chuan Ukraine-a kum tina an tih thin, National Prayer Breakfast-a politician, sumdawng leh palaite nena hun an hmannaah a sawi a ni.
Chawlhkar khat kal taah khan Trump-a chuan Russian President Vladimir Putin leh Ukrainian President Volodymyr Zelenskyy-a an inbiakna turin thil kalpui a ni tih a lo sawi tawh a; mahse, Russian thuneitute chuan hei hi chu a thleng mai dawn lo niin an sawi ve thung.
Trump-a hian Zirtawpni khan indo mek ram hruaitute an inbiakna tur ruahman a nih loh chuan chawlhkar hnih hnuah hmalak leh dan tur thu titluk a nih tur thu a sawi bawk.
Tun hnaiah mi pawimawh tak takin Kyiv tlawhin hei hian US hmalaknaa muanna a awm theihna tur hian ngaih pawimawh a hlawh hle nia ngaih a ni.
Canadian Prime Minister Mark Carney-a chuan Pathianni khan Kyiv tlawhin Zelenskyy nen an inkawm a, Canadian dollar tluklehdingawn hniha puihna tur a tiam a. NATO Secretary General Mark Rutte-a pawhin Zirtawpni khan Ukrainian khawpui a tlawh bawk.
Germany vice chancellor leh finance minister, Lars Klingbeil pawhin Thawhtanniah Kyiv thlengin ‘Germany-in muanna atana thil kalpui mekah Ukraine a thlawp theih dan tha ber tur’ an sawiho dawn nia sawi a ni.
Putin-a pawhin Thawhtanni khan Iranian President Masoud Pezeshkian-a a be ve bawk niin Kremlin chuan a sawi a. Russia leh Iran hi inkawmhnai tak an ni a, Putin-a hian China, India leh North Korea pawh khawthlang ramten indona avanga an hrek mek karah a pawt hnai ve bawk.
Putin-a leh Pezeshkian-a hi karlehah China-a Shanghai Cooperation Organization summit rualin Tianjin-ah an inkawm rin a ni.
Inremna a awm theih nana indawrna a kal mek laiin indona mualah pawh thawm a la ring hle zel a. Ukraine-a Air Force chuan Russia-in Pathianni zan zankhua khan drone leh thil dang hmangin vawi 104 an kap nia sawiin hmar leh khawchhak an bitum niin an sawi a. Thi leh hliam leh thil chhia an sawi lo.
Ukraine pawhin hmun hla thawk thei chi drone hmangin Russia bei ve zelin tuialhthei thlitfimna hmun te, ralthuam dahna leh inkalpawhna hmunte beiin nipui chawlh hmanga thlawhna zin vel pawh an tibuai.
Pathianni pawh khan Sharm El Sheikh atanga St. Petersburg pan Egyptian thlawhna, Russian khualzin phurte chu drone-a beihna avanga Russian khawpuia tumhmun khar a nih avangin Tallinn-ah tumtir niin Estonian chanchinbu, Postimees chuan a tar lang.
Russian defense ministry chuan Pathianni zan leh Thawhtanni tukah khan region pasarihah Ukrainian drone 23 an kap thla niin a sawi a, Ukraine nena an inrina hnaih leh ram ril lamah a nih thu a sawi bawk.