Ukraine indo tihtawp tumnain hma a sawn thei lo

Ukraine indo tihtawp tumnain hma a sawn thei lo
Ukraine-a muanna a awmna tura inbiakna chuan khawi lam nge a zawh zel dawn a chiang lo tih US President Donald Trump-a’n a sawi a, Russian President Vladimir Putin leh US palaite inbiakna erawh ‘thil tha tak’ a nih thu a sawi.
Kremlin chuan Nilaini khan Putin-a’n US-in Ukraine-a indona tihtawpna tura a rawt eng eng emaw a pawm a, la sawiho ngai erawh a awm niin a sawi tih a puang.
US special envoy Steve Witkoff leh Trump-a adviser, a makpa ni bawk, Jared Kushner chu darkar eng emaw zat Kremlin-a an awm hnuah Nilaini hma tak khan indo tihtawpna tur thu tihtluk tak nei lovin an haw.
Oval-a thuthar lakhawmtute a kawmnaah Trump-a chuan Witkoff leh Kushner hian telephone hmangin inbiakna chanchin an hrilh thu leh Putin-a pawhin ‘inremna neih a duh niin a lang’ tih an sawi tih a sawi a. Eng nge an dinhmun mek tih erawh a chiang lo tih a sawi.
“Eng ang chiah nge an sawi chhuah chu ka la hrilh thei lo che um” a ti a. “Ukraine nen pawh tha takin kan indawr,” a ti.
White House thuneitu chuan Witkoff leh Kushner-a hian Ningani (India-a Zirtawpni zing lam)-ah Miami-ah Ukrainian thuneitute an dawr leh dawn tih a sawi bawk.
Kremlin thupuangtu, Dmitry Peskov-a chuan US rawtna neihte Putin-a’n ‘a hnawl’ tia sawi chu a theih loh thu a sawi a. “A vawi khat nan hmaichhanah rawtna awm hi sawiho a ni,” a ti a. “Thenkhat chu pawm a ni a, thenkhat erawh pawm theih a ni lo va. Hetiang hi chu indawrnaa thil thleng pangngai a ni,” a ti.
Ukraine President Volodymyr Zelenskiy-a chuan Nilaini zana video a tihchhuahah US palaite nena indawr turin an inbuatsaih tih a sawi ve bawk.
Remna tura inbiakna a kal mek lai hian Kyiv chuan an ram khawchhak lamah Russia lakah ram an hloh mek a, ram chhungah indona kaihhnawihah ei ruknain a tibuai mek bawk.
Zelenskiy-a chief of staff, inbiaknaa an palai ber chu Zirtawpni kal ta khan ei ruk chhuituten a in an dap hnuah a bâng a. Cabinet minister pahnih pawh ban niin Zelenskiy-a thawhpui thin sumdawng pawh rinhlelh zingah a tel.
Indo titawp tura US-in rawtna a neih point 28 chu November thla tawp khan a put a, he rawtna hi Russia tana hamthatnna tur hlir nia ngaiin Ukrainian leh European an thawhpuite chuan an duh lo.
European-te hian Geneva-a an inbiak hnuah rawtna thar an siam ve zui a. Putin-a chuan European-te rawtna hi Russia tan chuan pawm chi ni lovin an sawi bawk.
February, 2023-a Russia-in Ukraine a rûn atang khan sipai sing tel an thi tawh a, tihtawp tumin US president-in hma a la a, hei hi inthlan a chuh laia a au hla pakhat a ni bawk a. Tun thlengin rah tha erawh a la chhuah lo rih zel a ni.