Daily Newspaper

Ukraine run chuan US-in chhang let dawn

20

US President Joe Biden chuan Ukrainian president Volodymyr Zelensky hnenah Russia-in Ukraine a run a nih chuan US chuan a chhan let tur thu a hrilh niin White House thuchhuah chuan a tarlang.

Ukraine ramri-ah Russia-in sipai a chhek khawl mek karah Biden chuan Zelensky nena phone a inbiakna an neihah “Russia-in Ukraine a run a nih chuan United States leh a thawhpui ramte chuan an chhang let ang,” tiin a hrilh thu White House press secretary Jen Psaki chuan a sawi.

A hma lawk pawhin US chuan Ukraine chu a thlawp thu sawiin Biden chuan Russian President Vladimir Putin nena inbiakna an neihah Moscow-in Ukraine a runa nih chuan sawhkhawk na tak a tawn tur thu a lo hrilh tawh bawk.

Zelensky nena inbiakna an neihah hian Biden chuan ‘nothing about you without you’ principle an vawn tlat thu a sawi bawk a, hei hi Ukraine hma lam hun kal zel tur a sawina a ni a.

Zelensky pawhin United States thlawpnaah a lawm thu sawiin ram pahnih inlaichinna duhawm bik tak chu kalpui chhunzawm zel a nih tur thu a sawi bawk.

Hetihlai hian January 9 leh 10 ah US leh Russian high-ranking officials te chuan Geneva-ah inbiakna an nei dawn a.

Tun hnai karthum chhungin Ukraine chungchangah Biden leh Putin te pawh tum hnih lai inbiakna an nei tawh bawk.

Putin chuan Biden nena inbiakna an neih chungchangah, “Mipui hriatah inremna siam kan tum lo, chiang taka kan sawi chu Ukraine kan run thei lo tih a ni,” tiin a sawi.

US leader chuan President Putin hnenah chiang taka Ukraine run a nih chuan hrekna an kalpui tur thu leh Europe-ah nasa zawka inbunin hma kan la ang tia a hrilh thu a sawi bawk.

Psaki pawhin Biden thusawi sawi chhawngin United States chuan Ukraine sovereignty leh territorial integrity humhim a tum tlat thu a sawi bawk.

US chuan Minsk Agreements tihhlawhtlin tumna kawng a thlawp thu a sawi bawk a. Minsk agreement hi France leh Germany te hmalaknaa siam niin inremna ang chuan Ukraine chuan a ram chhungah political reform kalpuiin Russia pawhin Ukraine khawchhak lama pro-Russian seperatist rebel te thlawp tihtawp a intiam bawk.

Washington leh European ram te chuan Russia chu Ukraine run tumah an puh a. Ukraine ramri ulah Russian sipai 100,000 chuang dahkhawmah an puh a. Putin hian kum 2014 khan Crimea region chu sipai chakna hmangin Ukraine a lo chhuhsak tawh a, he mi kum vek hian pro-Russian speratist te chuan inlakhran tumin Ukraine sorkar nen indona an kalpui zui bawk.

Hetihlai hian Moscow chuan Ukraine ramri bula sipai a chhekkhawl chu NATO lian zel tur danna tiin a sawi thung a, mahse, Ukraine chu tun thlengin NATO member a la ni lo thung.

Russia chuan Ukraine-in NATO hnaiha member nih a tum chu a helh hle a, a duh lo bur a ni. Nato member a nih chuan Ukraine chu Russia vau nan bera hman theih ni dawna ngaiin NATO ralthuam chhekkhawm nana Ukraine ram hman chu a duh lo a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy