Vladimir Putin chuan Russia-in Ukraine a run chu Nazi Germany beih nen Battle of Stalingrad kum 80 champha lawmna neihah a tehkhin.
Germany-in Ukraine hnena tank thawn luh a remtih chungchang chu sawiin Russian president chuan history a inthual nawn tiin a sawi a.
“Awihawm loh, mahse a dik si a ni,” tia sawiin, “German Leopard tank hmanga vauin kan awm leh ta,” tiin a sawi bawk.
Germany hi Ukraine-in a territory a venhim theih nana ralthuam hmanga puitu ram hrang hrang zingah a tel a ni.
Russia chuan kum khat kalta vel khan Ukraine a run thut a, hei vang hian Western ram te chuan Kyiv chu a inven theih nan ralthuam leh tanpuina an pe lut hum hum a ni.
Stalingrad ni thin tuna Volograd tia hming thlak tawha thusawina a neihah Putin chuan conventional weapons piah lam thlenga an hman theih tur thu a sawi bawk a.
“Indona tualzawla Russia hneha inbeisei te hian an hrethiam lo a ni. Russia nena modern warfare chu a danglam zar ang,” tiin kum 70-a upa Putin chuan a sawi a, “An ramriah kan tank te kan tir lut dawn lo, mahse, chhanletna tur hmanrua kan nei a. Armoured hardware mai mai a ni lovang, chu chu mi tin ten hre ngei rawh se,” tiin a sawi.
Kremlin spokesperson Dmitry Peskov chuan Putin thusawi hi sawi belhna nei duh lovin mahse reporter te hnenah ‘Khawthlang ram ten ralthuam thar Ukraine hnenah an pe zel bawk a, Russia chuan chhanglet turin a theihna nasa zawk a hmang ang’ tiin a sawi.
Putin hian Volvograd-ah hian World War II tawpna Battle of Stalingrad tih mai Soviet army tena German sipai 91,000 dawn an man champha hmanna a nei a. Kha indonaah khan mi maktaduai khat velin nunna an chan anga ngaih niin thisen chhuahna nasa berte zinga ngaih a ni.
He ni hriatrengna hun hman pual hian nikhat chhung lek Volvograd chu Stalingrad tia a hming thlak zuai a ni bawk a. Kar kalta khan Soviet leader hlui Joseph Stalin a lim chu phochhuahna neih a ni bawk.
Stalin kha kum 1924 atanga a thih kum 1953 thlenga Soviet Union hruaitu niin kum 1932-33 a Ukraine a tampui thlentu tia puh a ni bawk. Kha tampui kha Ukrainians te chuan Holodomor tiin an sawi a, mi maktaduai nga velin nunna an chan phaha ngaih a ni.
Ukraine indo kalpui zelah a tir phat atangin Putin chuan Russia in a runna chu nationalist leh Nazis te Kyiv sorkar kaihruai mekte thenfaina tur tiin dik lo takin a la sawi lui zui char char bawk a.
Volvograd a thusawina a neihah pawh chu tho chu sawi lehin, “Vanduaithlak takin, Nazism ideology chu tunlai zawka kaihhruaina hnuaiah a inlailang leh mek a, hei hi kan ram security atana pawi thei a ni,” tia sawiin, “Khawthlang ram te huangtauna hi kan hnawtkir ngei a ngai” tiin a sawi bawk.
German tank avangin Russia chu vauin a awm mek tia sawiin mahse Moscow chuan eng ram pawh amah vautute chhang let thei turin theihna a nei a ti zui bawk.