Um chhuahte awmna lo pe lo turin Sarma-a’n chah

Assam Chief Minister Himanta Biswa Sarma chuan phal lohna hmuna awm an hnawh chhuahte chu mipuiin awmna tur an lo pe tur a ni lo tih a sawi a, an lo pe a nih chuan um chhuah avanga ‘kan mite dinhmun’ mek hi ‘a chhe leh dawn’ tih a sawi.
Sorkar chuan mipuiin an thawhpui that phawt chuan phal lohna hmun luahtute chu him nan an nawr chhuak zel dawn tih a sawi bawk.
“Kan mite hian thil an hria a, min thawhpui tha lo vang tih ka ngaihtuah lo,” tiin Bodoland Territorial Region (BTR)-a Thawhtannia hun a hmanna hmuna hnawh chhuahten an state hmun dang an pan leh mai theih chungchang a sawi.
Um chhuah takte chu an lo kalnaah an kir leh dawn tih sawiin sorkarin a dang dawn lo tih a sawi bawk.
Mipuite chu hnawh chhuahte lo puitu ni lo turin a chah a, “Kan miten awmna tur an lo siamsak tur a ni lo. Chuti a nih loh chuan um chhuah hna thawh avanga kan dinhmun kâng hret hi a chhe leh thuai dawn a ni,” a ti a. Chief minister hian ram acre nuai 9.5-a zau phal lohnaah cheng an la awm tih a sawi bawk.
“Hna thawh tur tam tak a la awm a, kan miten min thawhpui that phawt chuan kan hnam himna turin kan che zel thei ang,” a ti.
Kar hmasaa Nagaland nena an inrina, Uriamghat-a dan phal lohva awm um chhuah chungchang sawiin, “Naga-ten min lo dawng lo va, Naga mite leh sorkarin min pui zawk a ni,” a ti a. Hnam bil bik sawi lovin, eng phal lohna awmte chu buaina tam tak thlentu bul an ni tih a sawi bawk.
An ramngaw thate chu kuhva chin nan, sangha dil siam nan leh a tichhe zawngin nasa takin an hmang tih a sawi.
Chief minister hian a hmain kum li liam ta chhungin acre 42,500 chuanga zauva phal lohva awm an hnawh chhuah thu a lo sawi tawh a, an um chhuahte hi chhui thui chuan dan lova Bangladeshi lut leh khua leh tui an nihna rinhlelhawm tak tak an ni tih a sawi.
Sorkar hriatpuina lova VGR (Village Grazing Reserve), PGR (Professional Grazing Reserve), Satra, Namghar, ramngaw leh vantlang hmuna awmte chu a tahtawlin an um chhuak zel dawn tih a sawi.
Pathianni khan Sarma hian sorkar chuan ‘Indian leh Assamese mite’ an um chhuah loh tur thu a sawi a, ram leilung fa zinga phal lohva ram luahte chu srkar ram luahah chhiar an nih loh thu a lo sawi tawh bawk.