Daily Newspaper

UN Assembly-ah US leh China inkar khi langsar

13

New York khawpuia UN General Assembly neihah US leh China inkara khi awm chu a langsar hle a. US President Donald Trump chuan coronavirus lendarh chungchangah China a dem a.

Hrilengah China chu ‘mawhphurhna’ a la tur a ni tia sawiin, Chinese President Xi Jinping thung chuan China chuan ‘tu ram nen mah Cold War neiha luh a duh lo’ tiin a sawi thung.

Khawvel ram ropui leh thiltithei ber pahnih te hi kawng hrang hrangah an inngur nasa hle a ni.

Kumina New York summit hi a tam ber chu virtuala neih niin world leaders te chu an pre-recorded speech an pe hlawm a ni.

Hei vang hian UN meeting pawimawha geopolitical theatre a hman a nih thinna chu kuminah a awm ta lo va. Ram tinin aiawh pali pakhat theuh tirin ram pakhatin ram dang a hnialna hun remchang a awm meuh lo.

Mahse, President Trump chuan a hun remchang neih chu a hlawhtlinna sawi nan leh a hmelmate phih nan a hmang thung.

China-in khawvel natna hrik a kai tir : Trump
“Hripui khawvela lentirtu ram hi mawh phurhna kan pe tur a ni, chu chu China a ni,” tiin Trump chuan a sawi a.

‘Virus len tirh lai khan China chuan an ram chhung lockdown siin ram danga thlawhchhuah a remti thung a. China chuan an ram chhunga thlawhna thlawh remti lo leh a khua leh tui te a lockdown laiin US luh ka khap kha thiamloh min chantir a ni’ iin a sawi zui bawk.

President Trump thusawi hi US-a Covid-19 leng chungchangah inthlan a hnaih tawh avangin thlithlai a ni a, Trump chuan Beijing chu virus len thupah puhin dang thei tur a ni a, a ti duh lo tia sawi fovin hei hi Beijing chuan behchhan nei lo tiin a hnawl thu a sawi tawh thung. Coronavirus avanga US a nunna chan chu 200,000 an chuang tawh a, khawvelah nunna chan tamna ber a ni.

US leh China te hi issue hrang hrangah sumdawnna, technology, Hong Kong leh China-in Xinjiang-a Uighur Muslim te a enkawl danah te boruak tang tak nei mek reng an ni.

US leader thusawi hnuah China President Xi Jinping chuan thu sawina nei zuiin ‘Civilisation inbeihna’ awm thei lakah fimkhur a ngaih thu a sawi thung a.

“Kan inanlohna leh harsatnate inbiakna leh inremna hmanga chinfel tumin hma kan la zel ang. Keini chauh hmasawn tum lovin leh keini chauh kan hlawkna leh midangte channa ni si hawia chet lak kan tum lovang,” tiin a sawi.

President Xi Jinping chuan US kap zuiin “Eng ram mahin khawvel thununin, midangte dinhmunah thuneihna neiin an hmasawnnate chu an tan chauha sawrbing turin dikna an nei lo,” tiin a sawi a, he a thusawi tak hi midang tena China an sawiseln a ni lawi si thung.

Hei bakah hian President Xi chuan khawvela greenhouse gases pe chhuak hnem ber China chuan kum 2030-ah peak emission tawngin kum 2060 ah chuan carbon neutral nih an tum thu a sawi bawk.

UN Assembly hi UN Secretary-General Antonio Guterres chuan thusawia hawnna neiin China emaw US hminghmerha sawi lang si lovin ‘Cold War thar a chhuah loh nan kan theihna zawng zawng nen hma kan la tur a ni,’ tiin a sawi a.

“Dinhmun derthawng tak lam panin kan kal mek” tia sawiin, “Kan khawvel hian economy lian ber pahnih te inkara khi chat nasa a dawl zo dawn lo,” tiin a sawi bawk.

Coronavirus leng chungchangah mahni chauh inngaihtuahna hmun a awm loh thu sawiin ‘Popolism leh nationalism a hlawhchham’ tiin a sawi a, “Heng hawia hmalakna kalpuinate chuan thil chhe zawk a hring zel zawk a ni,” tiin a sawi bawk.

President Trump chuan a thusawiah vision hrang hlak nei thungin “I khua leh tui te i enkawl thei a nih chuan thawh hona bulthut tha tak tak i siam thei chauh ang,” tiin a sawi thung.

French President Emmanuel Macron chuan khawvel hmalam hun chu US leh China inkara inhmelmakna chuan a tihniam tur a ni lo tia sawiin khawvel harsatna beih letna kawngah ‘modern new consensus’ neih a rawt thung a.

Russia President Vladimir Putin pawhin vaccine siam chung changah khawvel tang-ruala a sem darh dan tur thlenga sawiho tura online conference a rang thei ang bera neih a duh thu a sawi bawk a.

Brazil President Jair Bolsonaro chuan environment policy an kalpui avanga nasa taka sawiselna an tawh chu hnawlin Brazil hi ‘information dik lo thehdarh rapthlak tawngtu a ni’ a ti a. Mahse, Amazon rainforest chuan kangmei nasa ber kuminah a tawng thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy