un hnaiah raltlan an pung leh

Tunlaiin Champhai district-a Zokhawtharah raltlan an pung leh a, Myanmar a\anga lut an awm deuh reng tih thu dawn a ni.Zokhawtharah hian kar hmasa lam atangin raltlan lut thar an awm deuh reng a, May ni 14 thlenga lut thar hi mi 824 tia chhinchhiah an ni.
Zokhawthar hi |iau kam khua a ni a, |iau ral lehlam chu Myanmar a ni. An khaw epah Khawmawi a awm a, a chhehvel khua zawng zawng nen Zo hnahthlak an ni.
Zokhawthar YMA hruaitute hnen atanga thu dawn danin, Khawmawi leh a chhehvel hi tun hnaiah an ralmuang lo thar a, sorkar sipaiin lak tumin a bei dawn nia hriat a nih avangin Zokhawtharah hian fimkhur thu-ah an lo tlan lawk a ni.
An hriat danin, sorkar sipai hian tun hnaiah Falam an la tawh a, Falam atang hian |iau kam khua vel hrut thlak an tum a ni. Tun karah pawh Tonzang khuaah sorkar sipai leh mipui sipai hi an inbei mek a, Khawmawi leh a chhehvel hi sorkar sipai hian an hnaih telh telh ang tih hlauvin an lo tlanchhia a ni.
“Khawmawi vel an rawn bei a nih chuan a khaw nawtin an tlanchhe leh ang a, raltlan hi an pung leh hluai thei. Tunah hi chuan an pung tho na a, a hmaa a hlawma rawn lut hum hum ang kha chu an ni lo,” tiin Zokhawthar YMA hruaitu pakhat chuan The Aizawl Post a hrilh.
Tun hnaia lut tharte hian an chhungte an bel tlangpui a, khaw danga kal pawh an awm tiin a sawi a, khawtlangina buaipui ngai khawp an ni rih lo tih a sawi.
Zokhawtharah hian raltlan hi 6200 vel an awm sa a, Khawmawi leh a chhehvel khua atang hian a hmain raltlan lo awm sa mah se an ralmuan hnuah an kir leh a, mi 6200-te hi chu hmun hla zawka mite an ni.
Myanmar-ah hian hmun engemaw zat chu sipai sorkar dodaltute’n an awp a, sipai sorkar dodaltute hi mipui sipai tia hriat an ni. Hmun hrang hrangah hming hran neiin pawl a ding a, hmun khata inzawmkhawm pawh a awm chuang lo. Mahni zawn theuhvah sipai sorkar an hmachhawn a, Khawmawi leh a chhehvel hi chu 2023 kum tawp lam atang khan Hualngoram People’s Organisation-in an awp tawh. Sipai sorkar hian anmahni dodaltute laka ram an hloh tawhte lak let tumin thapui an chhuah mek a, Khawmawi leh a chhehvel pawh hi nawr an tum mekah ngaiin mi engemaw zat chu an lo insaseng a ni.