UN chief Antonio Guterres chuan climate change chungchanga report thar ber tihchhuah chu “mihringte damkhawchhuah nana kaihhruaina” tiin a sawi.
Report chuan clean energy leh technology te chu climate disaster pumpelh nana tihmakmawh tiin a sawi a.
Report chuan fossil fuel hman tlem zel chuan climate change avanga chhiatna nasa tak a pumpelh theih dan tur a tarlang bawk a. Tun ang renga kal a nih erawhin global temperature chu sang zual zel tura ngaih a ni.
UN secretary general Antonio Guterres chuan ram tin te chuan net zero plan an kalpui chak ngei a ngai a ti a. He target siam hi rang taka greenhouse gas emission tihhniamna tur niin hei hi kan chenna lei atmosphere tilumtu ber a ni a ti bawk a.
“Kan zavaia tana nunphung pangngai kan neih zui reng theih nana hun remchang inhawng chu rang taka kharin a awm mek a ni,” tiin report chuan a tarlang.
Khawvel ram hrang hrangte chuan global temperature sang zel chu 1.50C aia sang lova dah an tum a. Mahse, kan chenna lei chu 1.10C in a sang mek sa tawh a, mithiamte chuan kum 2030 ah chuan 1.50C a pel tawhin an ring a ni.
UK sorkar chuan he report hian khawvel ram tin te chu ‘climate commitments nasa zawka kalpui turin min phut a ni’ tiin a sawi a. UN climate sumit COP28 chu November thlaah neih a ni dawn bawk a.
“Net zero lamah UK chu world leader a ni mek a, mahse, hei aia rang leh chaka kan kal a ngai a ni” tiin a sawi bawk.
Pacific-a thliarkar tenaute chu climate change tuar nasa ber ber leh la tuar nasa zual zel tura ngaih an ni a.
He report chungchangah hian chair of the Alliance of Small Island States Fatumanava-o-Upolu III Dr. Pa’olelei Luteru chuan, “Kan mi leh sa te an chenna an rauhsan mek laiin leh climate commitment kan tihlawhtlin theih loh zel laiin fossil fuel industry chuan billion tel profit an la nei mek zel a ni. Hetianga chhuanlam siam reng hi a awm tawh tur a ni lo,” tiin a sawi.
Temperature sang zela khawvel ram tin te aiawha awm leh thurawn petu UN hnuaia awm Intergovernmental Panel on Climate Change thu leh hla chu ram tin tena an pawm tlan a ni bawk a.
Tun ang zela thil a kal a nih chuan kum 2100-ah chuan tuilian rapthlak tak kum za bi khata thleng thin chu khawvel zahve velah a thlen ngei rin a ni bawk.
Tunlai hian kum maktaduai 2 chhungin atmosphere-a gas CO2 chu a san ber lai a ni mek a. Kum 125,000 chhungin khawvelin a lum ber lai a tawng mek a, khawvel lum chu a zual zel tura ngaih a ni bawk a.
“Khawvel temperature in 1.50C hawlh lo mahse global warming a nasa zual zel dawn tho a, greenhouse gas pekchhuak tlem ta mahse tun hnai teah chuan a la lum zel dawn rih tho” tiin report chuan a tarlang bawk a.
“Kan chenna khawvel 1.50C aia sang lova dah kan tum a, 1.60C velah pawh lo awm thei ta ila, chu chu tihmiah loh ai chuan la tha fe zawk a ni” tiin Dr Friederike Otto, Imperial College, report ziaktu zinga tel chuan a sawi a. “He report atang hian kan theitawp kan chhuah a nih chuan tihhlawhtlin theih tam tak a awm a ni tih a lang a ni,” tiin a sawi.
UN-in climate change ngaihtuah ber zel
![](https://theaizawlpost.org/wp-content/uploads/tap_logo-min-large.jpg)