Sawrkar school-a zirlai uniform inang hman tumnaah zirtirtute nen an inrawn hmasa vek a, uniform rawng pawh inrawn tlanga thlan a ni tih School Education minister Lalchhandama Ralte chuan a sawi.
Assembly Session-a zawhna a chhannaah Education minister chuan school uniform inang hman hi an department hnuaia Human Resources Development Board-in India ram hmundang leh kan state economy dinhmun thlir chungin rawtna a siam a, ngun taka an ngaihtuah zui hnua an remti ta a; zirlaite zingah intluktlanna a awm theih nan te, primary atanga higher secondary thlenga awlsam zawka zirlaite hriathran an nih theih nan te, an discipline vawnthat nan te, awlsam leh man man zawka uniform lakkhawm leh lei a nih theih nan te, nu leh pa eizawnna leh thildang avanga kum laklawha awmna sawn ngaiten an awmna thara an school uniform an chhawm zel theihna atan te tih a nih thu a sawi a. Zirtirtu pawlte pawh rawn vek an ni tih a sawi.
School uniform kekawr leh pawnfen rawng turah hian primary-ah dumpawl leh middle-ah light grey niin, kamis var banbul ve ve; high school-ah a dum leh higher secondary-ah a dum, kamis var bantlawn ve ve hman a ni dawn a, hengah hian zirtirtu pawl tinten an duh an thlang theuh tih a sawi bawk.
School uniform inang hman tum hi 2022 March-a rel fel a ni a, mitin kan lo inhmakhua lawk theihna’n 2023 -2024 academic session atanga hman tan chauh tura tih a ni tih Education minister hian a sawi a ni.