Union Budget 2024 ah India hmarchhak hmasawnna atan cheng vaibelchhe nuaih tel dah a ni a, chumi hailuh leh hmasawnna atana hman chu state-a sawrkar laipui mawhphurhna a ni tih BJP Mizoram president Vanlalhmuaka chuan a sawi.
Thawhtannia an party office-a inkhawmah BJP State president chuan, BJP kaihhruai sawrkarin India ram pum hmasawnna tur a ngaihtuah avangin Viksit Bharat (Developed India) 2047 thlirin hma a la a, khawvela ram changkang, ram intodelh leh hausa ber nih tumin India zalenna kum 100 lawmna hun pualin hma a la tih a sawi.
He hmalaknaa India ram hmel tibal thei leh hmasawnna thlen harsatna bik chu inenkawlna dan tha zawk siamtha in mipui nawlpuiin hma an sawnna theihna’n sawrkar laipuiin hma a la a, a bikin Jammu & Kashmir inhungbikna thiah pawh mi tam takin doin tha ti lo mah se, Article 370 tihbo a nih avangin J&K-ah development nasa tak a thleng tih a sawi. Hei mai niloin, J&K-a firfiak ho zalen taka tual an chaina chu tih tawp a ni chho zel a, corruption hluar tak pawh a bo mek tih a sawi bawk.
India hmarchhak state-te pawh state hnufual ni reng thin kha, Modi sawrkar a pian atangin Look East Policy tih chu Act East a dahin, NE state hrang hrangah hmasawnna nasa tak a thleng tih Vanlalhmuaka hian a sawi. Union Budget 2024-ah pawh NE state hmasawnna atana India sawrkarin sum a dah chu mi tam tak chuan a tlem emaw tiin an sawisel a, nimahse hmarchhakte tan vaibelchhe nuai tel a dah a, chu budget-ah chuan loneitute hamthatna atan leh miretheite dinchhuahna tur hrang hrang a tam hle tih a sawi.
“India hmarchhak tana central-in budget a dah hi a tam hle a, he budget atang hian Mizoram hian engzat nge kan hai luh ve anga, hmasawnna turin engtin nge hma kan lak ang, tih chu sawrkar lai mawhphurhna a ni,” State BJP hotu hian a ti.
Union budget-a NE tana dah hai luh chu sawrkar lai kut – MBJP president
