By: MC.Lalthianghlima
March ni 1, 2019-a Chapchar kût kan hmannaah khân Chief Minister Pu Zoramthanga chuan thu sawiin, “He kan kût hmanna lâmmuâl kan tih thin hi, assam rifles hnên atanga kan hman hawh a la ni a. Amaherawhchu, May thla hnu lam atang chuan Pathianin rem a tih chuan heng ram, heng hmun zawng zawng hi kan ta a ni dâwn tawh a ni,” tiin a sawi a, mipui chuan hlim leh lawm takin kut bêngin kan Chief Minister thusawi chu kan chhânglêt a, kan lawm tlang hle a nih kha.
Tichuan, May 2019-a Assam Rifles insawn chhuah hun tur chu nghakhlel taka Zoram mipuiin kan thlir laiin, May thla chu a lo ral ta mai a. Chapchar kût 2019 kan hmannaa A.R insawn chhuah hun tur chungchâng kan Chief Minister-in a sawi, kan hlimpui êm êm leh mipui kut bêng thawmte chuan awmzia reng reng a nei ta lova, kan nghahhlelh May thla chu holam takin a ral ta mai a.
Hun lokal thui zêlin, September ni 24, 2022 ah Chief Minister Pu Zoramthanga chuan C.M’s conference hall-ah chanchinbumite kawmin, November thlaah Zokhawsâng rama A.R awmna hmun hawng turin union home minister Amit Shah chu Mizoram rawn tlawha lokal a tum thu a sawi leh a. A hun leh nî tak erawh an la tih fel loh thu a sawi a, November thla chhûng ngeia lokal turah erawh kan ngai a nih kha. A sawi zêlnaah union home minister pawhin lo remtihpuiin, a phûr hle tih a sawi nghe nghe.
November 2022 chu Zoram mipuiin nghakhlel takin kan han thlir leh a, kan union home minister Amit Shah chu Zokhawsânga A.R awmna hawng turin, a lokal lo leh tluan parh a, he hun nghakhlel taka thlîrtu Zoram mipuite chu a vawi-hnihna atân kan hawihai leh ta hle a, kan ngui nghuai a nih kha.
Kan Chief Minister meuhvin Zokhawsânga A.R awmna tur chu sak zawh tawh a ni tih union home minister a hrilh tih a sawi tawh chu, ni 6 November 2022-ah chuan “Zokhawsânga A.R Hqrs hawn hun tur la ti fel lo” tih chanchinbu-ah kan hmu ta daih thung a. Tichuan, Zokhawsânga kan A.R Hqrs hawng tur pawhin kan union home minister Amit Shah chuan lokal nî tih reng reng a nei thei chuang hek lo.
Tichuan, hmannî lawk March 2023 Mizoram assembly budget session neih zawh takah khan, kan chief minister chuan Zokhawsânga Assam Rifles-te awmna tur leh lâmmual rama Mizoram sorkar complex din tur lungphûm phûm turin, union home minister Amit Shah a rawn zin dâwn thu leh a rawn zin hun tur pawh March ni 17, 2023 a nih thu a sawi leh ta a. Hetih rual hian, nikum November thlaa rawn zin tura Amit Shah a sâwmna chu Gujarat inthlanah an campaign thu leh parliament session a awm leh nghal a, a rem ta lo tih a sawi tel bawk.
March ni 17, 2023-a Assam Rifles awmna thar tur (Zokhawsâng) hawng tura Amit Shah lokal tur chu phur angreng tak, a thulh leh mai ang tih hlauhthawnna nên kan lo thlîr leh a. Amit Shah union home minister hmêl reng reng Zoram mipuiin kan hmu lo a ni.
Sorkar thuchhuah chuan Zokhawsânga Assam Rifles complex hawng tur leh lâmmual sîr-a Laldênga cultural centre sakna tur lungphûm phûm turin, ni 31 March, 2023-ah union home minister Amit Shah a lokal tur thu chu an chhuah leh ta zâwk a.
Chumi hnu chuan, March ni 31 pawh kan thlen hma, ni 21. 3. 2023 ah chuan New Delhi-a châm mêk Chief Minister Pu Zoramthanga chuan, union home minister Amit Shah chu New Delhi-a a pisa-ah a hmu leh tih kan lo hria a. Chutah chuan Amit Shah chuan ni 1. April 2023-ah Zokhawsâng-a A.R battalion headquarters complex hawn ngei a tum thu leh Laldenga cultural centre din tur lungphûm rawn phûm a tum thu a hrilh niin, chief minister Pu Zoramthanga chuan a sawi leh ta thung a ni.
Heti êm êma A.R battalion headquarters complex hawn hun tur pâmtul a ni zut mai hi, a manganthlak hle a, keini lamin thil fel vek tawh anga kan sawi fo leh hawn mai theih tura kan ngaih hi, khu lam khuan an pawm lo em ni ang le? Dâwt kan sawi ngun ta lutuk êm mai.
Kum 2019 May thlaa Assam Rifles insawn chhuak tur leh, lâmmual kan ta ni tura kan ngaih chu, kan ta a la ni ta lo va. Chumi hnu pawhin Zokhawsânga A.R Hqrs hawng tura union home minister Amit Shah lokal tur anga kan Chief Minister meuhvin vawi eng emaw zât min hrilh hnu pawhin, vawiin thleng hian A.R sawn chhuaka, Zokhawsânga an Hqrs hawng turin Amit Shah hmêl Zoram mipuiin kan la hmu ta lo chu a nia, kan chief minister meuh A.R sawnchhuah chungchanga a tawng sual tam ta lutuk hi, central lam hi vuak-dûp ahnêkin, min vaw-dûp ta zâwk em ni le?
Engpawh ni sela, April ni 1, 2023-a Zokhawsânga A.R complex hawng tur leh lâmmual sîra Laldênga cultural centre sakna lungphûm phûm turin, kan union home minister Amit Shah chu beiseina sâng tak nên i lo thlîr leh phawt mai ang u hmiang.
UNION HOME MINISTER, AMIT SHAH A RAWN ZIN THEI LO
![](https://theaizawlpost.org/wp-content/uploads/tap_logo-min-large.jpg)