External Affairs minister Dr S Jaishankar chuan Ningani khan Aizawlah Lok Sabha inthlan atana Mizoram bik tinzawn BJP manifesto a tlangzarh a. Heng hi an tihhlawhtlin theih nan an candidate Vanlalhmuaka chu Mizoram mipuiin thlangtling turin a sawm.Manifesto tlangzarh hnu hian thu a sawi a. Manifesto-ah pawh an telh, Sittwe (Myanmar) Port kaltlanga hmarchhak state te tana Mizoram kaltlanga bungraw phurh luhna tur an ruahman chu, inthlan zawh veleh tihpuitlin tumin ngaihpawimawh hmasakah an nei zui dawn tih a sawi. Kum 5 chauh an thlir loa, kum 25 tal an thlir a, chumi chhunga hruaitu tur tha chu an duh a, Parliament chhung leh pawna an thawhpui theih tur an duh a, MP inthlan hian chumi kawng chu a hawnsak a ring tlat tih a sawi a ni.
Zawhna chhangin External Affairs minister chuan, Myanmar nena inrina hung leh free movement regime tihtawp an sawi a. Ram inthenawma chengte hnamzia leh nunphung inang, thui tak la inzawm tlat a awm tih chu a ministry mai niloin Home ministry pawhin a hriatpui a, amaherawhchu Myanmar ram rorelna a chi ri rih a, hmun tam takah sawrkarin ro a rel theih lohna a awm a, hemi hnuaiah hian dan loa thil tih leh ram tana tha lo thil tam tak chevel a tam vangin, ram pum leh state himna atan hetianga hma lak hi a ngai tih a sawi.
Mizoram leh Manipur kaltlanga Act East Policy ruahman chu Myanmar ramchhung buaina avangin a thuanawp a, pangngai taka hma lak chhunzawm a nih theih nan Myanmar-a group hrang hrangte pawh biak mek zel a ni tih a sawi a. Myanmar chauh niloin, South East Asia chu ngaihpawimawh ber pakhat a ni a, Act East Policy hnuaiah hian Bangladesh lam pawh an hawi tih a sawi bawk.
BJP sawichhiatna thu chu tak tak a nih loh bakah a tlangau ring ber Congress party phei chu hemi kawnga thu lakna tlak loh ber an ni tih Dr S Jaishankar hian a sawi a. Kum 10 hmalam kha chuan India ram dinhmun a tha loa, tunah chuan economy dinhmun tha ram 5 zingah a tel tawh a, kum hnih thum hnu ah phei chuan top 3-ah a lang tawh dawn tih a sawi. “Kum 4 kaltaa Covid a rawn len khan India chu ngaihtuahawm ber leh economy thuanawp phah nasa ber pawl ni tura khawvelin a rin kan ni a, chutiang chu kan thleng lo mai niloin, ram 100 chuang pui theitu zawkah kan tang a ni,” tiin, BJP rorelna hnuaia India dinhmun that dan a sawi a ni.
Zawhna chhangin, BJP chu sakhaw tih bik nei leh Kristiante dodaltu anga ngaih chu a pawm dan a ni lo tih a sawi a. India ramah tute pawhin sakhaw dang emaw midang rin dan emaw an zahsak vek tih a sawi.
Modi tluka India hmarchhak hmasawnna duha vei Prime minister dang an awma a hriat loh thu a sawi bawk. Chu chu foreign secretary a nih lai leh tuna foreign minister a nih hnu ah pawh a hmuh dan tih a sawi. Chumi hawi zawng programme leh policy a tam reng a ni, tiin, sawrkar hmasa hun laiin PM hian hmarchhak tan hna thawk tura Japan sawrkar sawm luh dan dap turin a ti a, chumi bawhzuina chu Mizoram pawhin a hlawkna telin, JICA nen super speciality cancer hospital din turin thu thlun fel a ni tih a sawi a ni.
MNF nen NDA-a thawk dun an nih angin, candidate intawm an neih mai loh chhan zawhna chu, duh zawk dang an nei a, NDA-a thawk dun ni mah se, an duh zawk chu zalen takin an thlang ve mai a ni tih Union minister hian a sawi.
Union minister-in manifesto tlangzarh “Ram himna atan ramri hung a ngai”
