Union minister of state for Information & Broadcasting leh Parliamentary Affairs Dr L Murugan chuan zan khat riakin Mizoram a rawn tlawh a. Lengpui Airport atangin Kolasib-ah zan riakin sawrkar hmalakna a tlawh bakah sawrkar hotute a kawm ang.
Airport-ah hian Information & Public Relations minister B Lalchhanzova leh Information & Communication Technology minister Dr Vanlalthlana te bakah a kaihhnawih sawrkar hotuten an lo hmuak a. I&PR minister hian Mizorama chanchinbu /media, film industry leh digital infrastructure tihmasawnna tura rawtna a lo thlen
A thu thlen zingah Mizorama school 200 leh college 20-ah animation, visual effects, gaming leh comics (AVGC) content creator labs din a nih theihnan allocation siamsak turin a ngen a. National Film Development Corporation leh Film and Television Institute of India (FTII) anga institution hmingthang kaltlangin Mizo film siamtute tana training leh skill development programme buatsaih sak turin a ngen.
Kumin kumtira a vawikhatna atana buatsaih ‘Lemchan Film Festival’ neih zawm zel a nih theihnan hma laksak tur leh, tualchhung thiamna leh kutchhuak pho chhuah rualin film industry chhunga thawhhona tha zawk a awm theihnan festival hi ni 5 chhung tala pawtsei turin a ngen a ni.
Hmarchhak state tan bik cinema theatre infrastructure cheithat leh din tharna atan scheme hrang siamsak turin an rawt a; hei hian tualchhung tawng, hnamzia leh nunphung vawnnun rualin hnathawh tur tam tak a siam dawn tih a hrilh a ni.
Information & Broadcasting ministry hnenah hmarchhak state-te tana 10% Gross Budgetary Support dahhran atangin Mizoram sawrkar hnuaia project thar leh hmasawnna tura ruahman hna hrang hrang sum sanction sak turin a ngen bawk.
Union MoS hian mamawh an thlen chu tihhlawhtlin ngei a tum thu a sawi a ni.
Union MoS-in Mizoram rawn tlawh
