Sawrkar thil pawimawh tia New Delhi-a kal Sports & Youth Services minister Lalnghinglova Hmar chuan Inrinni tlai khan Union Minister for Youth Affairs & Sports Dr Mansukh Mandaviya chu a chenna inah a hmu a, Sawrkar laipui scheme hrang hrang hmanga Mizoram sports tihhmasawn theih dan an sawidun.
Mizoram chu state lian lo leh mihring tlemna ni mah se, India leh rampawn thlenga hriat hlawh Mizo infiammi engemawzat an awm tih Lalnghinglova Hmar hian sawiin, Mizo thalaiten sports-ah theihna sang tak an nei tih a hrilh. Sawrkar laipui hnuaia sports tihhmasawnna tur scheme hrang hrangah Mizoram chu tel ve ngei se a duh thu a sawi a ni.
Union Sports minister chuan Mizoram leh India sports hmasawn nan theihtawp chhuah a tum tih sawiin, Sports ministry hnuaia scheme hrang hrang, a bikin Khelo India Scheme hnuaiah Mizoram tana hmalak dan tur an thlirdun a ni.
Mizoram minister hian kum 2036-a India-in Olympic Games thlen a tumnaah Mizoram-in tel ve ngei a duh tih a sawi a. Hemi atana inpuahchahna hmasa, kumin June 13 & 14 a Aizawla Mizoram Sports Conclave buatsaih chu a khaikhawmna lehkhabu Union minister hnenah hian a pe. Sports discipline hrang hranga talent nei thate haichhuah nan Mizoram khua zawng zawng hrutchhuakin sports coaching kalpui tum a nih dan a sawifiah bawk.
Vision 2036 Olympics nei chunga Mizoram sawrkar hma lo lak tawh dan leh hmathlir chu lawmawm a tih thu Dr Mansukh Mandaviya hian sawiin, a theih anga puih a tiam a ni.
Sports minister-in Mizorama sports hmasawnna chungchang sawidun tura a sawm angin, remchang hmasa berah Mizoram rawn tlawh a tum tih Union Sports minister hian a sawi bawk.
Union Sports minister hnenah sports-a hmasawnna tur thlen
