Daily Newspaper

United ah Cavani leh Telles

32

Pathianni zanah an an tualzawlah ngei Tottenham Hotspurs ngam lova an mualpho hnuin, Manchester United chuan an squad thuam chak hna an thawk chuk chuk a. An mamawh player pahnih; striker Edinson Cavani leh defender Alex Telles te an la lut.

Stirker thar Cavani
United tlarhmaa inkawp pathum; Marcus Rashford, Anthony Martial leh Mason Greenwood te an la puitling tawk lova, season tharah beisei anga thain an inlan thei lo. Crystal Palace leh Tottenham te an ngam lo tawh a, vanneihthlak takin Brighton an hneh hram bawk. Season liam ta khan a thlakna tur tha la lut si lovin Lukaku an chhuahtir ringawt tawh a, an tisual viau tawh. Season kal mekah erawh chuan tihsual nawn an tum tawh lova, striker tawnhriat ngah; kum 13 chhunga goal thun hnem pathum zinga tel phak Edinson Cavani an la lut.

PSG tana goal thun hnem ber Cavani hi Ligue 1 champion team-ah contract a hmang zo va, contract thar ziak lovin season tawp rualin a ropuina hmun a chhuahsan. La Liga club Atletico Madrid pan ngei tura ngaih a ni a, Serie A club ten an hmutai bawk. Bazar hun tawp dawn lamah United hian an dawr a, kum hnih cham turin an la lut zui ta a ni.

Cavani hian kum 2013 khan Napoli atangin Paris St-Germain a zawm a, a club tharah a chetha nghal hle. PSG tan hian inelna hrang hrangah vawi 556 zet a khel a, goal 341 zet thunin PSg tana goal thun hnem ber a ni. PSG tan a vawi 301 a khelh atangin goal 200 a thun tling der a, PSG tan goal 200 thun tling hmasa ber a ni. PSG hi Ligue 1-ah vawiruk a champion pui hman. Club tan a chetthat ang bawkin Uruguay tan pawh a chetha a, ram tan vawi 116 khel tling tawh in, goal 50 a thun tling tawh bawk.

United hian an tlarhnung thuamchak turin FC Porto defender Alex Telles chu kum li daih contract ziahpuiin an la lut bawk.

United left back thar Telles hi tlarhma pui thiam tak mai a ni a, Porto tan hian goal 26 zet a thun tawh bakah assist vawi 50 zet a nei tawh bawk. A manah hian £13.6m an thehchuak phawt a, £1.8m pek belh leh theih turin inremna an nei bawk a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy