Site icon The Aizawl Post

United an chak nawn leh

February 1, Nilai zan khan English Carabao Cup semi-final thawh hnihna khelh zawh a ni a. Manchester United chuan Mimuala an hneh tawh Notting-ham Forrest chu Old Trafford ah mikhualin, si hnih faiin an hneh. United hian si belhkhawmah 5-0 ngawta hnehna changin final an lut a, final ah Newcastle United an hmachhawn zui leh ang.
United in Old Trafford ah Notting-ham Forrest an mikhual tum hian hliam vanga chawl United player pahnih; Jadon Sancho leh Antho Martial te kirin inkhel an hmachhawn leh thei tawh a, Notting-ham Forrest lakah an che tha dun viau a, Martial phei chuan goal a thun hial nghe nghe a ni.
Manchester United hian City Ground ah si thum fai ngawta an lo hneh tawh Nottingham Forrest lakah an khel tha viau naa goal erawh an thun thei mai bik lo. Ball chang tam zawk leh goal thun theihna hun tha nei tam zawk ni chungin Red Devils hian goal thun turin minute 73 an nghah thlen a ngai. Minute 73-naah hian Etik ten Hag hnuaia goal thun thei tak Marcus Rashford siamsak atangin Anthony Martial chuan hmahruaina goal a thun. Hliam vanga United in an chhawr theih loh reng Martial-a’n goal a thun nghal hi manager Erik ten Hag tan a lawmawm viau ngei ang.

An mualah ngei si thum faia tlawm tawh Nottingham Forrest tan final luh beisei ngam a ni tawh lova, Old Trafford ah goal an chhuah vangin an tan beisei a bo leh zual sauh. An dinhmun chhe viau tawh mah se, huaisen takin an khingpuite an hmachhawn a, an mualpho lutuk tur thup mawi nan goal khat tal thun tumin United an nawr. Goal thun tuma Red Devils an nawr hi goal an chhuah belhna hmanruaah a chang ta thung.

Hmahruaina goal an thun hnu lawkah United hian an mikhualte an nawr zui zel a. Minute 76-naah goal an thun belh zui leh zat. Forward tangkai Marcus Rashford chuan goal thun theihna hun tha nei bawk mahse mahni hmasial lo takin Fred tan a siamsak thung. Rashford siamsak tha zet mai hi midfielder Fred hian goal ruakah awlsam zetin a pet goal a, an goal hnihna a thun. Fred goal thun hian an mikhualte dinhmun chhe zawkah a nawr liam a, thochhuak thei tawh lo turin an hnimphum. Manchester United hian City Ground ah si thum faia an hneh tawh Nottingham Forrest hi Old Trafford ah si hnih faiin an hneh nawn leh a, si belhkhawmah 5-0 a chakin, final an lut ta a ni.

Nottingham Forrest an hneh nawn leh tumah Anthony Martial leh Jadon Sancho te an chetha hi Manchester United manager Erik ten Hag tan thil lawmawm tak a ni a. EPL champion nih an tumna kawngah phur zawk leh inrintawkna sang zawk nen an inlan zui theih ngei a beiseiawm. United hi inelna hrang paliah champion thei dinhmun ah an ding mek a. Trophy lian pahnih nen tal season khar an tum hle ngei ang.

Nottingham hnawtchhuaktu United hian EPL ah pahnihna ni mek Newcastle United chu final-ah an hmachhawn zui leh dawn. United leh Newcastle hi kum 1999 khan final ah an lo intum tawh bawk.

Exit mobile version