United an chak, Spurs an tlawm

Pathianni zan khan English Premier League 2023-24 khelh chhunzawm a ni a, Manchester United chuan awlsam takin Everton an hneh. Awlsam taka United an chak laiin Tottenham an buai chhunzawm thung a, Spurs hi an mikhual Aston Villa lakah an tlawm a, pangana daihah an tla hniam tawh.
Goal mawi leh ropui
Beisei anga khel tha tluang hleithei lo Manchester United hi 19-naa awm mek Everton hmachhawn turin Goodison Park-ah an leng lut. Everton lakah hian Argentina rawlthar Alejandro Garnacho chuan goal ropui a thun. Garnacho goal thun hi goal of the season ni zui thei tura ngaih a ni a. FIFA Puskas award dawng zui thei hial tura ngaih ni nghal bawk a thun. Garnacho goal ropui bakah hian Marcus Rashford leh Anthony Martial ten goal an thun bawk.
Goodison Park-a lenglut United hian bul an tan tha viau a, inkhel tan atanga minute thumna lekah Diogo Dalot siamsak tha tak chu Argentina rawlthar Alejandro Garnacho chuan mawi zet maiin a back volley goal a, ropui zetin hmahruaina goal a thun. Everton si nghak Jordan Pickford ban phak rual loh a thlawk lut Garnacho goal hian fak zui a hlawh hle nghe nghe.
Hma takah goal an chhuah hnuin Everton in an si phurh sut tumin tan an khawh zui nghal a, Dominic Calvert-Lewin chuan goal thun theihna hun tha a hlah a, an si phurh a sut thei lo va, chawlhlawk hmain goal dang a luh belh thei lo.
Chawlhlawk hnu lamah United an che fuh leh thuai a, penalty an hmu. United defender hlui Ashley Young chuan box chhungah Anthony Martial a titlu a, penalty a chawi. Unites captain Bruno Fernandes chuan ball la in, season kal mekah goal khat chauh la thun Marcus Rashford a pe a, goal thunna hun remchang a siamsak. Rashford hian inringtawk takin a pet goal a, minute 56-naah an goal hnihna a thun. Si hniha hma an hruai hnuin United an khel tha chhunzawm a, goal khat an thun belh leh. Minute 75-naah Anthony Martial chuan an goal thumna a thun a, an hmahruaina a tizau. Martial goal thun hnu hian goal luh belh lovin inkhel a tawp a, United chu si thum faiin an chak zui ta a ni.
Everton lakah an chak vangin United in hma an sawn hret a, khelh 13 atanga point 24 hmuin paruknaah an inhlangkai. United in hma an sawn laiin point 10 lai paihsak an nih vanga 19-na daiha tlahniam Everton dinhmun a chhe leh zual a, Toffees hian khelh 13 atanga point 4 chauh hmuin 19-na an luah nghet leh zual.
Tottenham an tlawm leh tawh
Rin phak baka season bul tan tha, EPL club 20 zingah tlawm nei lova kal tluang rei ber, Arsenal leh Manchester City chungah awm a, hmahruaitu ni hman hial Tottenham an talbuai chhunzawm. Spurs hian Chelsea an hneh loh hnuin point na la hmu leh lo a, vawi thum ngawt an tlawm zawn ta hial a ni.
London club lian Tottenham hian an mikhual Aston Villa lakah bul an tan chhe hran lova, goal thun hmasa zawkah an tang. Minute 22-naah Giovani Lo Celso chuan hmahruaina goal a thun. He goal hmang hian hma an hruai reng a, hmahruai chungin chawlhlawk an hmang teuh hle. Minute 45+7 ah Pau Torres chuan goal thunin Villa si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Aston Villa an khel tha chhunzawm a, goal an thun belh thuai. Minute 61-naah forward ngaihven hlawh Ollie Watkins chuan hma an hruai letna goal a thun. Watkins goal thun hi Tottenham hian hun tawp thlengin an sut thei lova, an mualah tlawmin, an khelh hnuhnung vawi thumnah an tlawm zawn ta hial a ni. Aston Villa hneh lova an tlawm leh tak vangin Tottenham an tlahniam zel a, khelh 13 atanga point 26 hmuin panganaah an awm hial tawh a, parukna United nen an inkarah point hnih chiah a tla zep tawh.
Tottenham an hnungtawlh zel laiin Aston Villa in hma an sawn ve thung a, khelh 13 atanga point 28 hmuin top 4 huang an luah ta hial a ni.
An mualah Aston Villa an hmachhawn hma lawk hian Tottenham player leh manager hlui Terry Venables a boral a, inkhel tan hmain Terry Venables sunna hun hman a ni. Venables hian player leh manager angin Spurs hi FA Cup-ah a champion pui tawh.