Site icon The Aizawl Post

United an tlang, Arsenal an tla

March 16, Ningani zan khan UEFA Europa League last 16 second leg khelh a ni a. Premier League team lian Manchester United in Real Betis hneh nawn leha quarter-final an luh laiin, EPL hmahruaitu Arsenal erawh chu Sporting Lisbon lakah tlawmin, quarter final an lut zo lo thung.
United chakpuitu Rashford
Manchester United chuan Old Trafford-ah 4-1 an lo sawp tawh Real Betis chu Benito Villamarín khelmualah an luh khung a. World Cup zawh hnua player che tha tluang ber Marcus Rashford goal thun hmangin an chak a, awlsam takin quarter-final an lut.
Manager tawnhriat ngah Manuel Pellegrini-a enkawl Real Betis hian United lehthal tumin an mualah tan an khawh a, English club ropui United lakah bul an tan tha viau. Goal thun thuai tumin an mikhual an nawr nasa viau a. Goal thun theihna hun tha nei bawk mahse United si nghak David de Gea an paltlang thei lo. United pawh hian hlauhawm takin nawr thin mah se chawlhlawk hmain goal an thun thei bik lova, goal awm lovin chawlhlawk an hmang.
Chawlhlawk hnu lamah United in bul an tan tha a, goal pawh an thun thuai. Goal thun theihna hun tha uiawm taka a hlah hnu lawkah Marcus Rashford a chesual nawn duh lova, minute 56-naah tha zetin a pet goal a, hmahruaina goal a thun.
Marcus Rashford goal thun hnu hian goal dang a luh belh tawh lova, Manchester United chuan si belhkhawmah 6-1 ngawtin hnehna an chang a, awlsam takin quarter-final an lut. United hian quarter-final-ah khingpui hautak an neih zui a ngai dawn a. Europa League-a champion ngun ber Sevilla an hmachhawn dawn. Europa League-a champion ngun ber Sevilla hian ;ast 16-a an khingpui Fenerbahce chu si belh khawmah 2-1 in an hneh a, quarter-final an lut.
Arsenal an tla
Premier League hmahruaitu Arsenal chuan Estádio da Luz -ah 2-2 a an inhnehtawkpui tawh Sporting Lisbon chu Emirates Stadium-ah an mikhual a. An mualah hnehna changin, quarter-final luh tum viau mahse an chak zo bik lo. Gunners hi penalty shoot-out-ah vanduai zawkah an tang a, Europa League atangin a tla ringawt.
Quarter-fina lut tura chak mamawh Arsenal hian an mualah bul an tan tha a, goal pawh an thun thuai. Inkhel tan atanga minute 18-naah midfielde Granit Xhaka chuan minute 18-naah hmahruaina goal a thun a. Xhaka goal hmang hian hun rei tak chhung hma an hruai a. Quarter-final lut turin chak tlang tum viau mahse an goal an venghim tluan thei lo. Portuguese club lian tan Pedro Gonçalves chuan minute 62-naah pui zetin a pet goal a, an si phurh a sut. Lisbon tana goal thuntu Pedro Concalves hian si nghak Aaron Ramsdale awmhmun fuh tawp lo a hrem a, yard 46 zeta hla atangin goal ropui a thun. He goal ropui hmang hian si belhkhawmah 3-3 an inhnehtawk ta chiah.
Concalves goal ropui thun hnu hian pangngai leh extra-times-ah goal a luh belh thei lova, penalty shoot-out hmangin quarter-final lut tur zawk zawn chhunzawm a ni. Penalty shoot-out-ah hian Sporting Lisbon si nghak Adan chuan Gunners forward Gabriel Martinelli pet a dang a. Martinelli-a’n a pet goal loh hnu hian Sporting Lisbon tana pettu Nuno Santos chuan awlsam taka pet goal in chakna goal a thun a. Europa League atanga Arsenal hnawtchhuak in, quarter-final an lut zui ta a ni. Arsenal hnawtchhuaktu Sporting Lisbon hian quarter-final-ah Italian Serie A club lian Juventus an hmachhawn zui leh ang.
Quarter-final-ah Sporting Lisbon hmachhawn tur Juventus hian an mualah si khat faia an hneh tawh SC Freiburg chu ningani zan khan Mimualah si hnih faiin an hneh zui leh a. Si belhkhawmah 3-0 a hnehna changin quarter-final an lut.
Juventus rual hian Serie A club lian AS Roma chuan si belhkhawmah 2-0 a Real Sociedad hnehin quarter-final an lut a. Jose Mourinho enkawl Roma hian quarter-final-ah Feyenoord Rotterdam an hmachhawn zui leh ang.
AS Roma lakah fiahna hautak hmachhawn tur Duch club lian Feyenoord hian last 16-a an khingpui
Shakhtar Donetsk chu si belhkhawmah 8-2 ngawtin an sawp a, awlsam takin quarter-final an lut.
Dutch club lian Feyenoord Rotterdam in an mualah 7-1 ngawta Shakhtar Donetsk an sawp hi Europa League knock-out stage a insawpna nasa ber niin Lyon record an nihrual. Kum 2017 khan French Ligue 1 club lian Lyon chuan 7-1 in AZ Alkmaar an sawp a, hei hi Europa league knock out stage-ah insawpna nasa ber a ni a. Ningani zan khan Feyenoord Roterdam hian Lyon record an rawn nih rual ta chiah a ni. Last 16-a inkhel dangah Bayer Leverkusen in hnehna an chang ve bawk.

Eurosport
Manuel PellegriniChampions League last 16, second leg khelh chhunzawm a ni a. Champion Real Madrid chuan Anfield-ah 5-2 ngawta an lo hneh tawh Liverpool chu Karim Benzemna goal thun hmangin an hneh nawn leh a, phu taka hnehna changin quarter-final an lut. Nilai zana inkhel dangah Napoli chuan Eintracht Frankfurt an sawp a, quarter-final an lut ve bawk.
Reds an chak lo, an vui lo e!
Khelmual ropui, mikhual team te an talbuaina thin Anfield-ah ngei 5-2 ngawta an tlawm tawh vangin Liverpool hi tla tlukna ngaih an ni nghal a. Santiago Bernabeu-ah thil mak tih tumin lenglut bawk mah se si khat faiin an tlawm leh ta tho a. Champions League-ah Real Madrid an ngam lo tluang zel. Real Madrid lakah an tlawm zawn chhan chu an khelh that tawk loh vang a ni a. An tlawm dan chu a fair tawk viau nia a hriat thu Liverpool manager Jurgen Klopp chuan a sawi a, an vui lem lo.
Inlehthalna lian thlentir tuma Santiago Bernabeu a lenglut Liverpool hian beiseiawm takin bul an tan a, inkhel tantirh lamah goal an thun nghal teuh hle. Mohamed Salah chuan tha takin Darwin Nunez ball pe bawk mah se Nunez hian Real si nghak Thibaut Courtois a pal tlang zo lova, goal thun theihna hun tha uiawm takin a hlah. Chawlhlawk hmanin Cody Gakpo in hun tha nei bawk mah se Courtois a paltlang thei bik lo. Mualneitu Real Madrid pawhin an hun tha neih an chhawr tangkai thei bik lova, chawlhlawk hmain goal thun thei an awm lo.
Second half-ah champion lai Real Madrid in bul an tan tha a, goal an thun teuh hle a, Valverde chuan a hun tha neih hlahin, Alisson a paltlang thei bik lo. Valverde hian tuah goal theihna hun tha a hlah a, Benzema pawhin pet goal theihna hun tha a hlah ve bawk. Goal thun theihna hun tha hlah deuh malh malh mah se na taka an khingpuite an nawr rah an seng a, Liverpool dan rual lohin goal an thun ta nge nge.

Exit mobile version