United an tlang, City an tla

Nilaini zan khan English Carabao Cup last 16 khelh zawh a ni a, awlsam taka Manchester United an chak laiin Manchester City an tla ve thung.
Manchester United hi manager lailawk Ruud van Nistelrooy hovin an inlan a, Old Trafford-ah Leicester City an mikhual. An mikhual lakah an khel tha viau a, chawlhlawk hmain goal li ngawt an thun hman. Chawlhlawk hma hian goal hnih chhuah bawk mah se chawlhlawk hnu lamah goal khat an thun belh leh.
United tan hian midfielder Casemiro chuan Casemiro chuan minute 15-naah hmahruaina goal a thun. Hma taka goal an thun hnuin Alejandro Garnacho chuan minute 28-naah an goal hnihna a thun a. Minute 36-naah captain Bruno Fernandes-a’n an goal thumna a thun hnuin goal hmahruai thuntu Casemiro chuan minute 39-naah an goal lina a thun belh zui leh bawk. United in goal li ngawt an thun lai hian mikhual team Leicester City tan Bilal El Khannouss leh Conor Coady ten goal an thun a, chawlhlawk hmain an si phurh pahnih an sut then.
Chawlhlawk hnu lamah United an khel tha chhunzawm a, goal an thun belh leh thuai. Minute 59-na lekah captain Bruno Fernandes chuan an goal ngana a thun belh. Fernandes goal hnihna a luh hnu hian goal dang a luh belh thei tawh lova, United chuan an mualah 5-2 ngawta hnehna changin quarter-final an inhlangkai zui ta a ni.
United hian manager thar tur an zawng mek a, Sporting Lisbon manager Ruben Amorim nen an indawr uluk hle. Amorim nen hian an inrem thei ngei dawn niin a lang a, an inlak luh hun tur tak a la hriat loh thung. Heti a nih vang hian Van Nistelrooy hian Chelsea nen an inhmachhawn hunah United hi a kaihruai zui leh ngei a rinawm ta viau a ni. Foxes sawptu United hian quarter-final-ah Manchester City hnawtchhuaktu Tottenham an hmachhawn zui leh ang.
Manchester United in quarter-final an luh lai hian champion tura rinkai ber zinga mi Manchester City erawh chuan Tottenham Hotspur an hneh lova, quarter-final an lut zo lo.
Tottenham hian an mikhual City lakah bul an tan tha viau a, inkhel tan atanga minute ngana lekah Timo Werner chuan hmahruaina goal a thun nghal. Werner goal thun hnu hian Pape Matar Sarr chuan minute 25-naah an goal hnihna a thun belh zui leh. Si hnih an phurh hnuin City tan hian Matheus Nunes chuan chawlhlawk dawn hnaih minute 45’+4-naah goal thun bawk mah se an si phurh an sut zo thei lova, uiawm takin an tlawm a. Carabao Cup atangin an puanthuah an tel fel.