Manchester United manager thar Ruben Amorim chuan nimin khan Old Trafford-a a office tur a thleng a, head coach thar backroom staff zinga hmun chang ta lo Ruud van Nistelrooy pawhin manager puitling awm hmaa a club hlui enkawl hna a lo thawh lailawk a tawpsan zui ve nghal.
United coaching staff chhuahsan ta Dutchman kum 48 mi hi a chipui Erik ten Hag an ban rual khan interim manager ni tura ruat a ni.
Kumin July thla khan United chuan an striker hlui hi kum hnih chhung atan assistant coach ni turin Old Trafford-ah an hruaikir a; head coach ban a nih hnua caretaker boss a nih chhung khan game li khelhah tum thum chakpuiin, draw vawikhat nen a record chhe hran lo mah se manager thar Amorim chuan player ni chunga United-a kum nga lo khel tawh Netherlands striker hlui Van Nistelrooy a chhawr zui duh ta chuang lo a ni.
Van Nistelrooy chhuah thu an nemngheh ruala thuchhuah an siamah United chuan, “Ruud hi Manchester United legend a ni reng tawh ang. Club-a hna a rawn thawh chhunga a hawiher leh contribution avangin lawmthu kan sawi a, eng lai pawhin Old Trafford-ah kan welcome reng ang,” tiin.
Kum 2001 atanga 2006 chhung khan Ruud van Nistelrooy hian Manchester United tan game 219-ah goal 150 a thun tling.
United thuchhuah chuan an forward hlui bakah coach dang pathum Rene Hake, Jelle ten Rouwelaar leh Pieter Morel-te pawhin United coaching staff an chhuahsan ve nghal tih an tarlang tel.
Hetih lai hian United midfielder hlui Darren Fletcher chuan a club hluiah hian coaching hna a thawk chhunzawm thung dawn a, a hna ber tur chu first team leh academy inkar buaipui a ni ang.
United thuchhuah kal zel chuan Portuguese boss thar hnuaia an men’s first-team coaching staff kimchang an puanchhuah thuai tur thu an tarlang tel bawk.
Kum 39 mi lek Portuguese coach hian November ni 24 Premier League match-a Ipswich an luhkhung hunah United boss ni chunga a game hmasaber a nghakchhuak ang.
Chu mi atan chuan international break lai hian ni 13 chhung inbuatsaihna a nei dawn.
Tunthla tir lama kum hnih leh a chanve daih contract a ziah hnuah Sporting boss a nihna bansanin Thawhtanni khan Amorim hian Lisbon khua atangin UK a thlawklut a, nimin khan Manchester United boss thar ni chungin United chief executive Omar Barrada nen Manchester United training ground-ah an inhmu ta a ni.
United coaching staff ni zui lo Nistelrooy
