United in Arsenal an chhaih kawlh

Pathianni zan khan English Premier League-ah inkhel ngaihven hlawh tak a awm a. Team lian pahnih; Arsenal leh Manchester United te chu Emirates Stadium-ah an inhmachhawn. Inkhel hmuhnawm takah United in mualneitu Arsenal an chhaihkawlh a, Gunners hian hun pek belha goal hnih an thun hmangin hnehna hlu tak an chang.
Arsenal leh Manchester United te hi English club hlun, inel tawk tak an nih thin vangin eng inelnaah pawh inkhel se an boruak a te ngai lo hrim hrim a. Season thar tira intum an nih vangin Pathianni zana an inkhel khan ngaihven a hlawh leh zual. Anni pahnih hi an inkhelh hnuhnung vawi 11-ah an inhnehtawk thei viau a, rinlawk ang ngeiin Emirates Stadium-ah an inhnehtawk leh viau bawk. United in goal an thun hnu lawkah goal an thun thuai zel vangin United in Arsenal an chhaihkawlh a tih ngam.
Rinlawk angin Arsenal in an mualah an khel tha a, ball chang tam zawkah an tang. Inkhel tir lamah goal thun theihna hun tha an nei a. Kai Havertz chuan ho takin ball a pet thelh khut a, an hun tha neih chu ho lam takah a chhuah. Havertz-a’n a thelh hnu hian United zawkin goal an thun hmasa ta tlat thung.
Gunners hian goal thun tuma an khingpuite an nawr luat an tuar lo va, goal an chhuah hmasa. United hian fuh zetin an khingpuite an nawr let thut a, Christian Eriksen ball pek fuh tak la a chak taka ball a tlan luhpui a, inringtawk taka a khalh rem hnuin Marcus Rashford chuan minute 27-naah hmahruaina goal a thun. Rashford hian team lian lakah goal a thun thei viau a, a bikin Arsenal lakah goal a thun thei leh zual.
Marcus Rashford goal thun hian Arsenal a chhaih kawlh a, mu thlu ben harh zawk ang maiin an tho kang nghal at. Mawi taka ball an inpek kual hnuin, fuh zetin United tlar hnung an thiat a, goal an chhuah atanga second 40 em pawh a tlin hmain captain Martin Odegaard a pet goal a, United goal lawma au thangkhawk a reh fel hmain an si phurh an sut nghal der. Darkar chan ve hmaa goal khat ve ve an thun hian inkhel a tihmuhnawm zual a, team hnihten inkhel class sang an lantir ve ve. Inkhel class sang tak ni bawk mah se an fimkhur dun vangin an innawr pup pup lova, inkhel hmuhnawm filawr tak erawh a ni lo.
Goal khat ve ve an thun hnuin chawlhlawk hmain goal dang a luh belh lova, 1-1 a inhneh-tawk chungin chungin chawlhlawk an hmang phawt a, chawlhlawk hnu lamah inkhel hmuhnawm zawk an lantir ta thung.
Chawlhlawk hnu lamah Arsenal an khel tha chhunzawm a, United lamin hun pawh khawtlai hram dan kawng an dap ve thung a. |ul lova hun a khawral tam vangin United si nghak Andre Onana chuan yellow card a hmu hial nghe nghe. Mawi taka ball an inpek hnuin Kai Havertz chuan box chhungah a luhpui a, a tlu. Chelsea atanga an lak Havertz hian penalty hlawh-chhuak ngeiah a inngai a. Referee Anthony Taylor pawhin spot a kawk hman. VAR rawn a nih hnuin Taylor hian a thutlukna a sut a, United an him. Penalty an chawi loh hlauh vangin United him mah se an defender rinrawl Lisandro Mar-tínez a inhliam vangin Harry Maguire dah luh a ni a, Maguire a luh vangin United tantute thinphu a ran phah thung. United manager Erik ten Hag chuan hun tawp dawn hnaih lamah an forward thar Rasmus Hojlund leh rawlthar Garnacho a luhtir a, an goal nawr a nat phah a, a tifuh. Mawi taka Arsenal tlarhnung an thiah hnuin Argentina rawlthar Garnacho chuan chiang zetin minute 88-naah a pet goal a, hma an hruai nawn lehna goal a thun. VAR rawn a nih hnuin Garnacho hi a lo offside tih hmuhchhuah a ni a, United goal pawm a ni lo. Garnacho hi a offside leh offside loh chungchangah inhnialna a chhuak zui nasa hle.
Hun tawp dawn tepah goal an chhuah leh thuak hian Arsenal a tiharh nawn leh zawk a, na takin an khingpuite an nawr let zui nghal. Gunners hian ball an chang tam a, fuh tak taka ball inpekualin an khingpuite an dang ber. Hun pek belh minute 90+3-ah corner atanga ball kal chu an midfielder thar Decland Rice chuan fuh taka dawn hnuin chep angle chep takah fuh zetin a pet goal a, hmahruai letna goal a thun.
Rice-a’n Arsenal tana a goal thun hmasak ber venhim tumin Mikel Arteta team in tan an khawh a, United in an si phurh sut ngei tumin tan an khawh ve thung. Erik ten Hag team hian an nawr luat an tuar lova, hun tawp dawn tepah goal an chhuah belh leh. Minute 88-nah fuh zeta an nawr let hnuin bench atanga lut Gabriel Jesus chuan ball a um fal a, inringtawk zeta United defender a bum leh zet hnuin a pet goal a, hmahruaina a tizau. Jesus goal thun hnuin goal dang a luh belh thei tawh lova, Arsenal chuan United lakah hnehna chhinchhiahtlak changin, point thum hlu tak an hmu zui ta a ni.
Arsenal laka an tlawm danah United manager Erik ten Hag a lawm lo hle a. Garnacho goal an pawm loh chu offside a nih miau loh vangin pawm ngei tur a nih thu a sawi a. Jony Evans leh Rasmus Hojlund laka an foul vangin Arsenal hi penalty chawi ngei tur an nih thu a sawi tel a. Referee ten point an ruksak ni hiala a ngaih thu a sawi chhuak hial bawk.
Arsenal laka hnehna pawimawh tak chang Arsenal kha season tharah tlawm an la nei lova, khelh li atang point 10 hmuin panganaah an awm mek. United erawh chu season tharah vawi hnih an tlawm der tawh thung a. Khelh li atanga point ruk hmuin 11-naah an awm ve mek thung.