United-in chanchinbumite an do!
Manchester United chuan Thawhlehnia an boss Erik ten Hag-a news conference-ah khan media outlet pali atanga journalist tel tumte chu inlan ve an remti lo!
United thuchhuah chuan Sky, ESPN, Manchester Evening News leh Mirror aiawh chanchinbumite chuan Dutchman Ten Hag lakah player thenkhat an lungawi lo tiin thu an chhuah niin an sawi a, an club chungchanga a chhe lam chanchin vawrhdareh phalna an pek ni lote’n chutiang thu an tihchhuah avang chuan Thawhlehni news conference-ah he’ng media aiawhte tan tel ve a rem lo tih thuchhuah siamin an tarlang.
Club thuchhuah chuan, “News chhuahtu engemawzat lakah action kan la a; kan duh rilrem loh zawng an tihchhuah vang ngawr ngawr a ni lo a, keini lamin comment kan pek theihna hun remchang siam hmasa lo leh min bepawp hmasa loa side B lam chiah an tih-chhuah vang a ni.
“Tuntuma kan thil kalpui dan hi kan in-venna atana kan kal-phung pangngai leh tha bera kan hriat dan ding lai a ni a, kan action lak hian kan thawhho leh-zelna turah rah tha a chhuah ngei kan beisei,” tiin thuchhuah an siam.
Thawhlehni news conference-ah khan Ten Hag pawhin amah leh a player thenkhat thu inhmu lo anga an chhuah chungchang sawi-chhuakin, “Min dawr hmasa tur an ni a, chuti ta lo chuan an duh chinah an rekbung a, an duh angin an tichhuak mai a, chu chu thil tha a ni ngai lo e.
“Player-te’n ngaih-dan dang an lo nei pawh a ni thei e, kei chuan ka ngaithla zel dawn a, mahse, an lawmlohna emaw lungnihlohna min hrilh lo tlat a; player pahnih khat an ni mai thei a, a tam zawk hi chuan tlang tak, thuhnu dawn chung leh huaisen takin an ngaihdan leh pawm loh dan an sawi thin,” a ti.
Nizana Chelsea an hmachhawn hma thleng khan United hian point 24 hum chungin Premier League table-ah pasa-rihna daih an luah a, club chhung boruak fuh tawk lo anga chanchinbumite’n an chhuah pawh hi dawt muhlum chu a nih a rinawm chiah lo!
Chutih laiin manager Erik ten Hag hi chuan Blues an hmachhawn dawna media a hma-chhawn tum hian Man-chester United dressing room-ah boruak chhia leh innghirnghona a awm lo tiin tan a khawh a, journalist palite’n United inthlakna pin-danah an manager-in 50% pawh thlawp a hlawh tawh lo tia an chhuah chu a pawm lo tih a sawi.
Media thuchhuah a dik reng em tih zawhna a chhanna kal zelah Dutch coach chuan, “Teuh lo mai. Team tinah hian khelhna hmun chan loh vanga hlim lo player hi chu an awm vek a, chu chu thil kalphung pangngai nen pawh a inhlat lo. Kan lut lo a nih pawhin kan hun herchhuah ni kan nghak mai tur a ni a, chumi ka sawi avang chuan kan dressing room-ah buaina kan nei tihna a ni lo,” a ti.
Vawithum league-a an chakzawn hnuah karliamta Inrinni khan Newcastle United mual-ah sikhat faiin United an tlawm a, kha chaklohna khan an manager a tibuai hran lo tih sawiin Ten Hag chuan chawlh-kar duhawm kara duh-awm lo vawikhat avangin team an buai chhe mai lo tih a sawi a, kawng dik an zawh zui zel thu leh Newcastle game-ah khel tah tawk lo mah se Galatasaray leh Everton an hneh tum khan football tha tak khelin, goal pawh tha tak tak an sualchhuak tih a tarlang a, Magpies game bikah pawh khan khel tha lo mah se point khat tal hlawhchhuak turin goal chance tha zet zet pahnih an hloh tih a sawichhuak.
United-in chanchinbumite an do!
![](https://theaizawlpost.org/wp-content/uploads/Untitled-406.jpg)