Site icon The Aizawl Post

United in Leeds a chelh

February 8, Nilaini zan khan English Premier League 2022-23 khelh chhunzawm niin, inkhel pakhat a awm. Nilai zana inkhel awmchhunah manager nei lova awm mek Leeds United chuan Old Trafford-a an khingpui Manchester United an hneh teuh hle. United hian Jadon Sancho goal thun hmangin an si phurh an sut zo thei hram a, harsa takin point an hlawhchhuak.

Old Trafford ah United an ngui
Premier League-ah pathumna ni mek a, an chung chiaha awm Manchester City point hmuh zat point 45 nih rual tura point thum mamawh United hian City leh Arsenal hnaih theihna hun tha an neih an chhawr tangkai zo lo va, hun pawimawhah chak an harsat. Old Trafford a lenglut Leeds United hi team talbuai, manager nei lova awm mek an ni a, table-ah 17-na luah mektu an ni nghe nghe. United tan Leeds hi awlsam taka hneh theih tura ngaih a ni a, Red Devils hian an mualah point thum an hmu ngei tura ngaih a ni. Beisei lawk loh takin United hian harsa takin tlawm an pumpelh hram ta chauh a, teal talbuai Leeds an hneh zawh loh vangin United an ngui a, Olf Trafford a ngui nghuai.

Manager nei lova awm mek Leeds United hian khelmual ropui Old Trafford ah khawvel mak tih khawpin bul an tan tha a, inkhel tan atanga minute khatna lekah goal an thun nghal pang. Ball an thah fel chiah tihin an khingpuite an nawr nghal chat a, United tihsual an hrem zui nghal. Mawi tak ball an inpek hnuin Wilfried Gnonto chuan lei hrulah kawh zetin a pet goal a, hmahruaina goal a thun. He goal hian United a barakhaih, goal thuntu Leeds ngei pawh a barakhaih tel bawk a, khelmual chhung leh pawna miten mak an ti vek hlawm.

Team lian United lakah hma taka goal an thun hian Leeds United player te phurna namen lo tak a pe a, tha tho zetin Old Trafford ah an sapatal zui theih phah. Chawlhlawk hmain goal thun belhna hun remchang an nei a, David de Gea an paltlang zo lo thung. United tan Ganarcho chuan goal thun theihna hun tha nei bawk mahse Leeds tlarhnungin an lo tauhchhuahsak hlauh thung a, si khata hnufual chungin chawlhlawk an hman a ngaih phah.

Second half ah Leeds United in bul an tan tha nawn leh a, goal an thawkchhuak leh thuai. Minute 48-naah defender Raphael Varane chuan angle chep zetah mak tak maiin an lamah a ti-goal teh tlat a, vanduaithlak takin mikhual goal hnihna a thunsak. Si hnih faia hma an hruai vangin Leeds an phur leh zual a, team lian lakah point thum hmuh ngei tumin thapui an thawh zui nghal.

An mikhual Leeds United lakah si hnih ngawta an hnufual hnuin United in goal thun ngei thapui an thawh zui nghal chat a, an khingpuite an nawr ngawrh leh zual sauh. Minute 62-naah Diogo Dalot ball vawrhluh tha tak chu Marcus Rashford chuan tha zetin a tauh lut a, United goal khatna a thun.

Rashford goal hian United player leh an mahni tantute a fuih phur leh zual a, an mikhualte an nawr na leh zual sauh bawk. Na taka an nawr hlawkpuiin goal an thun belh leh thuai. Minute 70-naah Jadon Sancho chuan box chhungah vanneihthak taka ball a dawn chu tha zetin a pet goal a, an si phurh a sut zo ta nge nge. United hian goal thun belhin, chak tum viau mahse an hlawhtling zo lova, an tualzawlah ngei uiawm takin point hnih an hloh ta a ni.
An mikhual Leeds United lakah an chak zawh loh vangin United in City nihrual theihna hun tha an hloh a. Hmahruaitu Arsenal hnaih leh zual a, champion an beiseina a khawk tel bawk. United hian vawi 22 khelin, point 43 an hmu tawh a. Hmahruaitu Arsenal aiin game hnih ngawta an khel tam zawk chungin an inkarah point sarih zet a la zep mek.

Old Trafford ah ngei point thum hlawhchhuak se Leeds United tan hnehna ropui a tling ang a. Manager nghet an neih loh laia United nen an inhnehtawk thei pawh hi an tan result tha a tlin tho thung ang. United laka point an hlawhchhuah hmang hian West Ham United an lehpel a, 16-naah an inhlangkai. An lehpelh tak West Ham ai hian vawi khatin an khel tam zawk thung.

Exit mobile version